2 ნოემბერს მორისი დალასში კონცერტს მართავდა, თუმცა მუსიკალური საღამო მოულოდნელად ქაოსში გადაიზარდა, როცა თაყვანისმცემლების ნაკადი სცენისკენ გაიჭრა. ამის შემდეგ მომღერალი იძულებული გახდა, შოუ შეეწყვიტა.
კონცერტი Fair Park Music Hall-ში მიმდინარეობდა. ინციდენტი მაშინ მოხდა, როცა მორისი ასრულებდა სიმღერას First of the Gang to Die. ამ დროს სცენაზე ერთი თაყვანისმცემელი ავიდა და სცადა, მუსიკოსს ჩახუტებოდა. მომღერალი თავდაპირველად არ დაბნეულა, ხოლო დაცვის სამსახურმა თაყვანისმცემელი სცენიდან სწრაფად გაიყვანა. თუმცა, მალე სიტუაცია უკონტროლო გახდა, როცა სხვა მსმენელებმა სცენაზე ასვლა დაიწყეს. ნაკადის გამო დაცვის თანამშრომლებს აუდიტორიის შეკავება უჭირდათ.
TMZ-ის მიერ მოპოვებული კადრების მიხედვით, დაცვის ერთ-ერთი წევრი ფანების სცენაზე აჭრის დროს წონასწორობას კარგავს. სავარაუდოდ, მან ფეხი დაიზიანა. ინციდენტისას მორისი სცენას სწრაფად გაარიდეს. მუსიკოსს მომხდარზე ჯერჯერობით ოფიციალური განცხადება არ გაუვრცელებია.
ეს პირველი შემთხვევა არ არის, როცა მორისის კონცერტის მსვლელობისას სცენის დატოვება მოუწია. მის კარიერაში მსგავსი შემთხვევა სხვადასხვა მიზეზით არაერთხელ მომხდარა. მათ შორის იყო ხმის პრობლემები, გარემო პირობები ან თაყვანისმცემლებთან დაპირისპირება.
2009 წელს მორისიმ Coachella-ს ფესტივალზე კალიფორნიაში სცენა დატოვა იმის გამო, რომ ახლომდებარე კვების ობიექტებიდან ხორცის წვის სუნს გრძნობდა. 2014 წელს მან სან-ხოსეში გამართული კონცერტი ნაადრევად დაასრულა, მას შემდეგ, რაც რამდენიმე თაყვანისმცემელმა სცენაზე ასვლა სცადა. იმავე წელს, ვარშავაში, მან კონცერტი დაწყებიდან 25 წუთის შემდეგ შეწყვიტა უცნობი თაყვანისმცემლის მიერ უხეში კომენტარის მოსმენის შემდეგ. 2017 წელს მორისიმ არიზონაში მიმდინარე შოუ ექვსი სიმღერის შესრულების შემდეგ ხმის პრობლემების გამო შეწყვიტა. მსგავსი სცენარი განმეორდა 2022 წელს ლოს-ანჯელესის Greek Theatre-ში, სადაც მან სცენა 30 წუთში დატოვა, ხოლო მისმა ბენდმა აუდიტორიას აცნობა, რომ კონცერტი დასრულდა.
