ნინა სუბლატმა ახალი სიმღერა გამოუშვა, რომლის სახელწოდებაა „ცარიელი”. ეს არის პირველი სინგლი არტისტის ალბომიდან Hecta, რომელიც 2024 წლის პირველ დეკემბერს გამოიცემა.
ახალი სინგლის და დაანონსებული ალბომის შესახებ მუსიკოსს Billboard Georgia ესაუბრა.
ნინა სუბლატი:
„რთულია, მოგიყვეთ ამ სიმღერის იდეის შესახებ. არასდროს ვგეგმავ, არასდროს ვუღრმავდები, რას და რატომ ვწერ. შემოქმედებითი პროცესი რაღაც ბუნებრივი მოვლენასავითაა. ვფიქრობ, ის, რასაც მე განვიცდიდი და ვგრძნობდი ამ სიმღერის შექმნისას, ჟღერადობით და განსაკუთრებით ტექსტით, გასაგებად არის გადმოცემული. გულწრფელი სურვილი მაქვს, „ცარიელი” მსმენელისთვის იყოს ის, რასაც თავად გადაწყვეტს.
„ცარიელი” არტისტის პირველი ქართულენოვანი სიმღერაა, რომელიც 2018 წელს დაიწერა. მუსიკის ავტორი გიორგი შამანაურია. როგორც ნინა სუბლატი აღნიშნავს, თავდაპირველად არ ეგონა, თუ ეს ნამუშევარი ოდესმე გამოქვეყნდებოდა, თუმცა სიმღერის ჩაწერიდან რამდენიმე წლის შემდეგ მიხვდა, რომ ის ერთ-ერთ უმნიშვნელოვანეს ადგილს დაიკავებდა ალბომში.
ნინა სუბლატი:
„გიორგის ჯერ დასრულებულიც არ ჰქონდა ტრეკი, რომ ტექსტი და მელოდია უკვე მკაფიოდ მესმოდა გონებაში. მახსოვს, მობილურის ხმის ჩამწერ აპლიკაციაში ჩავიწერე, რომ არ დამვიწყებოდა და მეორე დღესვე ჩავწერე სტუდიაში. ხანდახან ხდება ისე, რომ სიმღერა ხუთ წუთში იწერება და ასეთ დროს ვხვდები, ამაზე უკეთესს ვერ მოვიფიქრებდი; ამაზე გულწრფელი ვერაფრით ვიქნებოდი, რამდენი დროც არ უნდა დამეთმო.”
რაც შეეხება დაანონსებულ ალბომს, არტისტის თქმით, Hecta ერთგვარად მისი პირადი ისტორიაა. ის ასევე ეძღვნება ავტორის საყვარელ მითოლოგიურ ფიგურას, ქალღმერთ ჰეკატეს. ალბომი 11 სიმღერას აერთიანებს. როგორც მუსიკოსი Billboard Georgia-სთან საუბრისას აღნიშნავს, ალბომი მის შვიდწლიან ციკლს აღწერს და ყველაზე მნიშვნელოვან განცდებს გამოხატავს.
ჟანრობრივად არტისტის შემოქმედება არ შეცვლილა – დაანონსებული ნამუშევარი ტრიპ ჰოპის, სინთპოპის, ემბიენთის, დარქ პოპისა და კიდევ რამდენიმე ჟანრის სინთეზია. ნინა სუბლატის თქმით, შესაძლოა, Hecta შედარებით მძიმე მოსასმენი იყოს, ვიდრე მისი სხვა ნამუშევრები.
„ვხვდები, რომ ეს ალბომი მხოლოდ მაშინ შეგიძლია მოისმინო, როცა ძალიან გჭირდება: როდესაც რაღაც გარდამტეხი პერიოდი გაქვს და მას მარტო გადიხარ. ასეთ დროს Hecta აუცილებლად გახდება შენი მეგობარი და მასში აუცილებლად იპოვი ერთ ისეთ სიმღერას მაინც, რომელიც ამ მარტოობას შეგიმსუბუქებს,” – ამბობს არტისტი.
ალბომის სრულ კონცეფციაში დიდი ადგილი უკავია ყდის ე.წ. არტვორქს. Hecta-ს ვიზუალურ მხარეზე აკა ფროდიაშვილმა, მიმი აბინტრამ, ირაკლი ნოდიამ და ირაკლი ლობჟანიძემ იმუშავეს.
ნინა სუბლატი:
„ვიზუალზე ფიქრისას გონებაში მხოლოდ ის გარემო მიტრიალებდა, რომელშიც წერის პროცესში ვიმყოფებოდი – სტერილური, მშვიდი, ბნელი, განმარტოებული, სილამაზით სავსე, სევდიანი, არაფრით გამორჩეული მაგრამ მყუდრო. ალბომის გარეკანად საკუთარი ფოტოს წარმოდგენაც კი ზედმეტად მეჩვენებოდა. რამდენიმე თვის წინ, ჩემი პერფორმანსის შემდეგ, შემხვდა აკა ფროდიაშვილი. ის ჩემთვის ერთ-ერთი გამორჩეული ქართველი დიზაინერი და უდიდესი შემოქმედებითი ენერგიის მატარებელი ადამიანია. ისე, რომ სიმღერები მოსმენილიც არ ჰქონდა, რაღაც მისტიკური გზებით ზუსტად აღმიწერა, როგორ ხედავდა ალბომის ვიზუალურ მხარეს და ეს ის მომენტი იყო, როდესაც ჩვენი ხედვები ერთმანეთს სრულიად დაემთხვა. პარალელურად, საქართველოში იმყოფებოდა ჩემი დიდი ხნის მეგობარი, არაჩვეულებრივი ფოტოგრაფი მიმი აბინტრა, რომელიც ასევე მისტიკურად გახდა ამ ყველაფრის ნაწილი და ერთობლივად გადავიღეთ ყდის ფოტო. ეს არის თეთრ სტერილურ ფონზე მოჭრილი თმებით დაწერილი Hecta. ფოტოს დანახვისთანავე მივხვდი, რომ ეს სწორედ ის იყო, რაც ძალიან მინდოდა და რაც ძალიან უხდება მთლიან კონცეფციას – თმა, როგორც სხეულის განუყოფელი ნაწილი, წარსული თავგადასავლების მიმღები და გამტარი, რომელიც მუდამ შენი ნაწილი იქნება, თუმცა მოჭრილ მდგომარეობაში შენთან ფიზიკურად აღარ არის.”
Hecta დამოუკიდებლად გამოცემული ალბომი იქნება. მუსიკის ავტორი და პროდიუსერი ნინა სუბლატი და გიორგი შამანაური არიან. ალბომი 2024 წლის პირველ დეკემბერს გამოვა. Hecta-ს გამოცემამდე კი, ნოემბერში, რამდენიმე სინგლი გამოქვეყნდება.
