ელექტრნული მუსიკის სივრცე BASSIANI ინსტაგრამზე განცხადებას ავრცელებს. ბილბორდ საქართველო მას უცვლელად გთავაზობთ:
„მეათე დღეა, რაც საქართველოს ყველა ქალაქში მასობრივი საპროტესტო დემონსტრაციები უწყვეტად გრძელდება, მას შემდეგ, რაც არალეგიტიმურმა ხელისუფლებამ საზოგადოებას ხმის უფლება წაართვა, ღიად და დეკლარირებულად შეაჩერა ქვეყნის სწრაფვა ევროპულ ოჯახში გაწევრიანებისკენ, მიიღო რეპრესიული ანტი-ლგბტ კანონი და დაიწყო რუსული ავტორიტარული რეჟიმის დამყარება. უპრეცედენტო მასშტაბის სახალხო პროტესტის ჩახშობის მიზნით, სისტემა ყოველდღიურად, არბევს აქციებს წყლის ჭავლით, ცრემლსადენი გაზით, ძალადობრივი დაჯგუფებებითა და სხვა საშუალებებით.
დემონსტრანტთა შეუპოვრობაზე პასუხად, სისტემამ სასტიკი სადამსჯელო ღონისძიებები დაიწყო, უკანონოდ დაპატიმრებულია 400-ზე მეტი ადამიანი, რომელთა 80% გახდა ფიზიკური ძალადობის, დამცირების, წამებისა და არაადამიანური მოპყრობის მსხვერპლი, რაც წარმოადგენს ტერორს საკუთარი ხალხის წინააღმდეგ. ჩადენილი დანაშაულებისთვის დღემდე არცერთი მოძალადე პოლიციელი არაა დასჯილი.
სოლიდარობას ვუცხადებთ სისტემის ყველა მსხვერპლს და მძევალს, ყველა შეუპოვარ და დაუმორჩილებელ ხმას და მოვითხოვთ აქციაზე დაკავებული დემონსტრანტების დაუყოვნებლივ გათავისუფლებას.
თბილისის საკლუბო სცენა ერთ კვირაზე მეტია გაფიცულია, ძალა და ენერგია ახლა ქალაქის ქუჩებისკენაა მიმართული. არ გვაქვს უფლება, ქვეყნისთვის ასეთ ეგზისტენციალურ მომენტში თუნდაც ერთი ნაბიჯით დავიხიოთ უკან. მოვუწოდებთ თითოეულ მოქალაქეს არ დავთმოთ მრავალწლიანი ბრძოლისა და შრომის შედეგი, თანასწორობასა და თავისუფლებაზე დაფუძნებული საზოგადოება და გავაგრძელოთ უკომპრომისო ბრძოლა.
BASSIANI აგრძელებს გაფიცვას და აუქმებს ამ კვირაში დაგეგმილ საკლუბო ღამეებს. თუმცა, არავინ იცის, რამდენ ხანს გაგრძელდება ეს პროცესი.
სამწუხაროდ, არსებული პოლიტიკური და ეკონომიკური კრიზისი გაქრობის საფრთხის წინაშე აყენებს ისედაც მძიმე მდგომარეობაში მყოფ საკლუბო კულტურას, რომელიც სინათლისა და წინააღმდეგობის ერთ-ერთი ნაპერწკალია და მისი გადარჩენა კრიტიკულად მნიშვნელოვანია. ამიტომ, მეგობრებსა და მხარდამჭერებს, გთხოვთ, დაგვეხმაროთ ხმის გავრცელებასა და უსაფრთხო სივრცის და მოძრაობის შენარჩუნებაში დონაციის საშუალებით.
დაიკავე ქუჩა, გამარჯვება გარდაუვალია”
