7 დეკემბერს პარიზის ღვთისმშობლის ტაძრის გახსნის ცერემონიაზე ხატია ბუნიათიშვილმა დაუკრა. ქართველმა პიანისტმა ღონისძიებაზე მარჩელო-ბახის „ადაჟიო” შეასრულა. გამოსვლის ვიდეო ბუნიათიშვილმა საკუთარ ფეისბუქ გვერდზე გამოაქვეყნა.
„პარიზის ღვთისმშობლის ტაძარი… უსასრულო კიბე, რომელსაც პარიზის ცისკენ მიჰყავხარ. პარიზის ღვთისმშობლის ტაძარი – ესმერალდას თავისუფლება, კვაზიმოდოს უმანკოება, ადამიანთა უფლებები, რომელზეც ვიქტორ ჰიუგო ოცნებობდა. პარიზის ღვთისმშობლის ტაძარი, რომელიც გვაშინებს იმის ჩვენებით, რომ უკვდავებაც შეიძლება განადგურდეს, მაგრამ ამავდროულად ის მაინც აქ არის – ძველი, ლამაზი, თავისუფალი და მარადიული…” – წერს პიანისტი ვიდეოს აღწერაში.
პარიზის ღვთისმშობლის ტაძარი 2019 წელს ხანძრის შედეგად დაზიანდა. 5-წლიანი რესტავრაციის შემდეგ კი 2024 წლის 7 დეკემბერს ტაძარი ხელახლა გაიხსნა. გახსნის ცერემონიას 50-მდე ქვეყნის მეთაურები ესწრებოდნენ, მათ შორის იყო საქართველოს პრეზიდენტი სალომე ზურაბიშვილი.
