ტეილორ სვიფტმა რეკორდული საკონცერტო ტურნეს, Eras Tour-ის უკანასკნელი შოუ ჩაატარა. თუმცა, მის ფანებს ახალი შესაძლებლობა აქვთ, მომღერლის მუსიკალურ კარიერას ახალი წიგნის მეშვეობით გადახედონ. Heartbreak Is the National Anthem – ასე ჰქვია წიგნს, რომლის ავტორი Rolling Stone -ის ჟურნალისტი რობ შეფილდია. წიგნი უკვე ხელმისაწვდომია როგორც ბეჭდური ვერსიის, ისე აუდიო ფორმატის სახით.
აუდიოწიგნს თავად შეფილდი კითხულობს და ის ამჟამად პლატფორმა Audible-ის მუსიკალური ბესტსელერების სიაშია. Heartbreak Is the National Anthem-ს ვხედავთ ისეთი ვარსკვლავების შესახებ დაწერილი წიგნების გვერდით, როგორებიც არიან Van Halen, R.E.M. და ბობ დილანი.
წიგნი ტეილორ სვიფტის კარიერაზე, მის განვითარებაზე ფოკუსირდება. ნამუშევარი გამოკვეთს სვიფტის გავლენას მუსიკის ინდუსტრიასა და პოპ კულტურაზე. რობ შეფილდი, რომელიც სვიფტის კარიერას მომღერლის პირველივე ნაბიჯებიდან აკვირდებოდა, მკითხველს სიღრმისეულ ანალიზს სთავაზობს.
Heartbreak Is the National Anthem სვიფტის მუსიკალურ მოგზაურობასა და კულტურულ გავლენას ეძღვნება. ავტორი გვიყვება, როგორ იქცა სვიფტი ქანთრი ჟანრის თინეიჯერი მომღერლიდან 21-ე საუკუნის ერთ-ერთ უდიდეს პოპ ვარსკვლავად. წიგნი შეიცავს საინტერესო ისტორიებს და იმ მნიშვნელოვანი მოვლენების ანალიზს, რომლებმაც ვარსკვლავის კარიერის ფორმირებაში დიდი როლი შეასრულა.
აუდიოწიგნის ხანგრძლივობა ხუთი საათი და 29 წუთია. მისი ფასი Amazon-ზე 21 დოლარია, Audible-ის პლატფორმაზე კი აუდიოწიგნის მოსმენა 99 ცენტად არის შესაძლებელი.
წიგნმა უკვე დაიმსახურა კრიტიკოსების შეფასებები და მკითხველთა აღიარება. გამოშვებისთანავე ნამუშევარი The New York Times-ის ბესტსელერად იქცა. მას საშუალოდ 4.3 ვარსკვლავის რეიტინგი აქვს. ერთ-ერთი მიმომხილველი შეფილდის სტილს „დადებითად დახასიათების, კულტურული ანალიზის, კრიტიკული კომენტარებისა და სახალისო დეტალების” ნაზავს უწოდებს, რაც სვიფტის ფანებისთვის განსაკუთრებით მიმზიდველია.
კიდევ ერთი რეცენზია წიგნს სვიფტის ხელოვნებისადმი მიძღვნილ სასიყვარულო წერილად მოიხსენიებს. Dey Street Books-ის მიხედვით კი, ეს არის პირველი წიგნი, რომელიც ტეილორ სვიფტის მუსიკალურ და კულტურულ გავლენას სიღრმისეულად მიმოიხილავს.
