The Hollywood Reporter-ის ინფორმაციით, ცნობილ როკ-მომღერალ დეივ გროლის ქალიშვილი ვაიოლეტ გროლი, სავარაუდოდ, სადებიუტო ალბომზე მუშაობს. ინფორმაციის თანახმად, ვაიოლეტს პროდიუსერი ჯასტინ რეიზენი ეხმარება, რომელიც თავის დროზე ისეთ არტისტებთან თანამშრომლობდა, როგორებიც არიან: Charli XCX, Drake, ჯონ ლეჯენდი და კიმ გორდონი.
ვაიოლეტ გროლი პირველად მუსიკალურ სივრცეში 2018 წელს, 12 წლის ასაკში გამოჩნდა, როცა მამასთან, დეივ გროლთან ერთად ადელის ცნობილი სიმღერის, When We Were Young-ის ქავერი შეასრულა. მოგვიანებით ის ასევე შეუერთდა დეივ გროლსა და ბენდ Nirvana-ს ყოფილ წევრებს Heart-Shaped Box-ის ქავერის შესრულებაში. გარდა ამისა, მას ჩაწერილი აქვს ბექ-ვოკალი ისეთ არტისტებთან, როგორებიც არიან St. Vincent და Beck.
ვაიოლეტ გროლი ასევე მონაწილეობდა Foo Fighters-ის ალბომებში შესულ სიმღერებში Medicine at Midnight და But Here We Are. მან Foo Fighters-ის დრამერ ტეილორ ჰოკინსისადმი მიძღვნილ კონცერტშიც მიიღო მონაწილეობა. მუსიკოსმა სადებიუტო სინგლი 2021 წელს გამოსცა, როცა ამერიკული პანკ-როკ ბენდ X-ის სიმღერის, Nausea-ს ქავერი შეასრულა.
„ის ნამდვილი ემოციური მომღერალია, მისი ვოკალი გასაოცარია, რაც მის ნიჭიერებას ადასტურებს.” – ნათქვამია The Hollywood Reporter-ში.
მიუხედავად ამ ინფორმაციისა, ვაიოლეტ გროლი სადებიუტო ალბომის შესახებ ოფიციალურ ინფორმაციას არ ავრცელებს.
დეივ გროლი და მისი ოჯახი საზოგადოებრივ სივრცეში სექტემბრის შემდეგ შედარებით ნაკლებად ჩანან, მას შემდეგ, რაც დეივ გროლის უკანონოდ დაბადებული შვილის შესახებ გახდა ცნობილი. „ვაპირებ, რომ ვიყო მოსიყვარულე და მუდამ მისი მხარდამჭერი მშობელი. მე მიყვარს ჩემი მეუღლე, შვილები, და ყველაფერს გავაკეთებ, რათა მათი ნდობა აღვადგინო და მათი პატიება დავიმსახურო”, – დაწერა დეივ გროლმა სოციალურ მედიაში.
