ლოს-ანჯელესში ძლიერი ხანძრის რამდენიმე კერა სწრაფად ვრცელდება. Associated Press-ის ინფორმაციით, დასავლეთ მხარეს გაჩენილი ხანძარი ლოს-ანჯელესის ისტორიაში ყველაზე გამანადგურებელია. ძლიერი ქარის გამო ცეცხლი კიდევ უფრო სწრაფად ვრცელდება, რის გამოც ამ დროისათვის უკვე 30,000-ზე მეტი ადამიანია ევაკუირებული. ამავდროულად, აღმოსავლეთ ნაწილში გაჩენილმა ხანძარმა ხუთი ადამიანის სიცოცხლე იმსხვერპლა და ბოლო დღეში სტიქიის მასშტაბი გაორმაგდა.
ცნობილი პერსონები საკუთარ პლატფორმებს იყენებენ, რათა ათიათასობით დაზარალებულ მაცხოვრებელს საჭირო რესურსებზე მიაწოდონ ინფორმაცია. არიანა გრანდე ტრაგედიას ინსტაგრამის ე.წ. Story-ში გამოეხმაურა: „გული მტკივა ყველა იმ ადამიანის გამო, ვინც ლოს-ანჯელესის დამანგრეველი ხანძრის შედეგად დაზარალდა,“ – წერს ვარსკვლავი და იმ ორგანიზაციების სიას აზიარებს, რომლებიც დაზარალებულების დახმარებაზე არიან ფოკუსირებულები. LAFD Foundation, California Community Foundation და Mutual AID LA Network – ეს ის სამი ორგანიზაციაა, რომელთა ბმულები არიანა გრანდემ გააზიარა. მან ასევე გამოაქვეყნა ინფოგრაფიკა, რომელშიც ევაკუაციის და ცხოველთა თავშესაფრების სიაა მოცემული. იგივე პოსტი ინსტაგრამის Story-ში The Weeknd-მაც გააზიარა.
მიმდინარე მოვლენებს გამოეხმაურა ბილი აილიშიც. „რაც ახლა ლოს-ანჯელესში ხდება, ძალიან საშიში და დამანგრეველია,” – დაწერა არტისტმა და ლოს-ანჯელესის სახანძრო დეპარტამენტის ბმული გააზიარა.
შონ მენდესმა დახმარების სამსახურების იგივე ბმულები გააზიარა და დაამატა: „ვწუხვარ მათ გამო, ვინც სახლი დაკარგა. ვერ გადმოვცემ, როგორ მტკივა გული.” ვანესა ჰაჯენსმა გულშემატკივრებს მოუწოდა, თვალყური ადევნონ ევაკუაციის ზონებს. „ეს ყველაფერი ძალიან საშიშია. გული მწყდება ყველა დაზარალებულზე. მადლობა ყველა მეხანძრეს, ვინც საკუთარ სიცოცხლეს რისკავს,” – წერს ჰაჯენსი.
სოციალურ ქსელში მიმდინარე მოვლენებზე კომენტარს აკეთებს პერის ჰილტონიც. ჰილტონი ერთ-ერთი ცნობილი ადამიანია, რომლის სახლი ხანძარმა გაანადგურა. ვარსკვლავის თქმით, ის ლოცულობს ლოს-ანჯელესისა და კალიფორნიისთვის და აზიარებს ინფოგრაფიკას, რომელშიც მოცემულია ისეთი ორგანიზაციები, როგორებიცაა: American Red Cross, Baby2Baby, Calfund Wildfire Recovery Fund, California Fire Foundation Wildfire და Disaster Relief Fund, LA Food Bank და Watch Duty.
