კერი ანდერვუდი იმ გამომსვლელთა შორის იყო, რომლებიც პრეზიდენტ დონალდ ტრამპის ინაუგურაციაზე წარდგნენ.
ქანთრის სუპერვარსკვლავის შესრულება ტრამპის საინაუგურაციო სიტყვის შემდგომ შედგა. მისი გამოსვლა ტექნიკურმა პრობლემებმა შეაფერხა, რის გამოც მომღერალი ორი წუთის განმავლობაში სცენასთან იდგა. პროგრამაში კი აღნიშნული იყო, რომ ანდერვუდს შეიარაღებული ძალებისა და აშშ-ის საზღვაო აკადემიის გუნდებთან ერთად უნდა ემღერა და მისი გამოსვლა ფიცის დადებამდე იყო ჩანიშნული.
ამის ნაცვლად, ქანთრის ვარსკვლავმა America the Beautiful-ის ა კაპელა ვერსია შეასრულა. „თუ იცით სიტყვები, დამეხმარეთ,” – მიმართა მან აუდიტორიას, რომელიც ანდერვუდს სიმღერაში შეუერთდა.
მანამდე მომღერალმა განცხადება გაავრცელა, სადაც წერდა: „მიყვარს ჩვენი ქვეყანა და ჩემთვის პატივია, ვიმღერო ინაუგურაციაზე და ვიყო მცირე ნაწილი ამ ისტორიული ღონისძიებისა. ჩვენ ყველანი ერთად უნდა დავდგეთ ერთიანობის სულისკვეთებით და მომავლისკენ გავიხედოთ.”
ინაუგურაციაზე ანდერვუდის გამოსვლამ როგორც ქება, ასევე კრიტიკა დაიმსახურა. LGBTQ+ ფანები მომღერლის ამ გადაწყვეტილებით გაბრაზებული და იმედგაცრუებული იყვნენ. ანდერვუდი მანამდე, 2012 წელს, ერთსქესიანთა ქორწინების მხარდამჭერ განცხადებებს აკეთებდა, სანამ 2015 წელს მისი დაკანონება მოხდებოდა. ახლა კი LGBTQ+ თემის წევრებმა გააპროტესტეს მისი გადაწყვეტილება, ემღერა ტრამპის ინაუგურაციაზე, როცა მისი საპრეზიდენტო კამპანია სწორედ სექსუალური უმცირესობების უფლებების შეზღუდვას მოიცავდა.
ნახეთ კერი ანდერვუდის გამოსვლა:
