ამერიკაში მცხოვრებმა ქართველმა მომღერალმა ნინი ბრეგვაძემ, სასცენო სახელით Nini Iris, საქართველოს სახელით ევროვიზიაზე გამოსვლის სურვილი გამოთქვა.
Nini Iris-მა ინსტაგრამის სთორიში გულშემატკივრებს მიმართა: „ჩემო უძვირფასესო ქართველებო, ხალხის დიდი თხოვნიდან გამომდინარე და ასევე ჩემი სურვილით, ვყოფილიყავი საქართველოს წარმომადგენელი ევროვიზიაზე, დავწერე სიმღერა და გავუგზავნე პირველ არხს. ველოდები პასუხს. მიყვარხართ.“ – წერს მუსიკოსი.
„მთელი წლის მანძილზე უამრავი ადამიანი მიგზავნიდა თხოვნას, რომ ევროვიზიაზე გავსულიყავი და მეც დამაფიქრა ამ შესაძლებლობამ. ყოველთვის მზად ვარ ჩემი ქვეყნის სახელით წარვდგე მრავალმილიონიანი აუდიტორიის წინაშე და ვასახელო. სიმღერა დავწერე და სურვილი მქონდა, რომ მაღალი ხარისხის პროდუქტი წარმედგინა კომიტეტის წინაშე. დემოზე მუშაობა ჯერ კიდევ ზაფხულში დავიწყე, ნოემბერში წავიღე კალიფორნიაშიწარმატებულ პროდიუსერებთან სამუშაოდ და დეკემბრის დასაწყისში გავუგზავნე განსახილველად პირველ არხს. ამასთანავე წერილში მივუთითე რომ მზად ვიყავი სხვა კომპოზიციაზეც მემუშავა მათთან ერთად თუ გაგზავნილი არ მოეწონებოდათ. ხშირად ხდება რომ, ჯერ კანდიდატს არჩევენ და შემდეგ მუშაობენ სიმღერაზე. ორივე ვარიანტი არის ჩემთვის მისაღები. ამჟამად ველოდები მათგან პასუხს და დიდ იმედებს გამოვთქვამ, რომ ამის შესაძლებლობა მომეცემა. თუმცა ვინც არ უნდა აირჩიონ წარმატებებს ვუსურვებ!” – აღნიშნავს Nini Iris ბილბორდ საქართველოსთან საუბარში.
შეგახსენებთ, რომ Nini Iris 2023 წელს ამერიკული „ვოისის“ მონაწილე იყო, თუმცა პროექტს ნახევარაფინალის შემდეგ გამოეთიშა.
რაც შეეხება 2025 წლის ევროვიზიის მუსიკალურ კონკურსს, წელს მას შვეიცარია მასპინძლობს. კონკურსი 13, 15 და 17 მაისს, ქალაქ ბაზელში St. Jakobshalle-ის დარბაზში გაიმართება, რომელიც 12 000-ზე მეტ მაყურებელს იტევს. 2024 წელს კი ევროვიზიის კონკურსის გამარჯვებული შვეიცარიის წარმომადგენელი, Nemo გახდა, სიმღერით The Code.
