მირიან ხუხუნაიშვილი ვროცლავის ოპერის მუსიკალური ხელმძღვანელის პოზიციაზე დაინიშნა და უფლებამოსილების შესრულებას ახალი სახელოვნებო სეზონიდან შეუდგება. ამის შესახებ ქართველი დირიჟორი სოციალურ ქსელში წერს.
„ჩემს სამშობლოში განვითარებული მოვლენების გამო, ჩემი სიხარული კოჭლია, თუმცა მინდა, მაინც გაგიზიაროთ, რომ 2025 წლის სექტემბრიდან პოლონეთის ერთ-ერთი გამორჩეული თეატრის, ვროცლავის ოპერის მუსიკალური ხელმძღვანელი ვიქნები.”
ინფორმაციას ამის შესახებ თავად ვროცლავის ოპერაც ავრცელებს და წერს, რომ 2025/2026 წლის სახელოვნებო სეზონზე თეატრის მუსიკალური ხელმძღვანელი „ახალი თაობის ქართველი დირიჟორი” მირიან ხუხუნაიშვილი იქნება, რომელიც ამ პოზიციაზე თეატრის ახალმა დირექტორმა მიიწვია. ახალი მენეჯმენტის საზოგადოებისთვის წარდგენა პრესკონფერენციაზე შედგა, სადაც კომენტარი მირიან ხუხუნაიშვილმაც გააკეთა:
„დიდი პატივია ვროცლავის ოპერის მუსიკალური დირექტორის პოზიციაზე დანიშვნა. ჩემი მიზანი იქნება არა მხოლოდ დიდი კონცერტების ტრადიციის გაგრძელება, არამედ ახალი იდეების გაცნობა და ახალგაზრდა ტალანტების მხარდაჭერა, ასევე მუსიკის ახალი მიმართულებების აღმოჩენა. გუნდთან ერთად ჩვენ აქტიურად ვიმუშავებთ, რათა უმაღლეს სახელოვნებო დონეს მივაღწიოთ.”
როგორც ვროცლავის ოპერის ვებსაიტზე ვკითხულობთ, ამ სეზონზე მირიან ხუხუნაიშვილი ამავე თეატრის სცენაზე ორ კონცერტს უდირიჟორებს – აპრილსა და მარტში.
