სულ რაღაც ერთი წელი დარჩა ათწლეულამდე, რაც რიანამ ამ დრომდე თავისი ბოლო ალბომი გამოსცა. პოპვარსკვლავი Anti-ს გამოშვებიდან ცხრა წლის იუბილეს აღნიშნავს.
ამ თარიღს მომღერალი სოციალურ ქსელში გამოეხმაურა და 2016 წელს გადაღებული კადრების ვიდეოკოლაჟი გააზიარა, რომელსაც ფონად SZA-სთან თანამშრომლობა და Anti-ს გამხსნელი სიმღერა Consideration ადევს.
“happy ANTIversary” – წერს რიანა ვიდეოზე.
Anti, რომელშიც შედის Billboard Hot 100-ის ჰიტები Work, Kiss It Better და Love on the Brain, ორი კვირა ლიდერობდა Billboard 200-ში და ჯამში ჩარტში 456 კვირა გაატარა. ალბომის შემდეგ რიანამ რამდენიმე ცალკეული კომპოზიცია გამოსცა, მათ შორის Born Again და Lift Me Up, რომელიც ოსკარსა და გრემიზე იყო წარდგენილი, თუმცა მისი ყურადღება უმეტესწილად Fenty-ზე იყო ფოკუსირებული.
მიუხედავად ამისა, წლების განმავლობაში პოპვარსკვლავი ფანებს იმედს აძლევდა, რომ ახალი ალბომი გზაში იყო. გასული წლის აპრილში მან ინტერვიუში თქვა, რომ მეცხრე ალბომისთვის „ბევრი ვიზუალური იდეა” ჰქონდა, თუმცა არ ჰქონდა შესაბამისი სიმღერები. „ალბათ ვიზუალური იდეები მიმიყვანს იმ სიმღერებამდე, რომლებიც მჭირდება, რომ შევქმნა.”
ორი თვის შემდეგ კი რიანამ დააანონსა, რომ მეცხრე ალბომზე მუშაობას იწყებდა. „არ მინდა, უარი ვთქვა იმ სიმღერებზე, რომლებიც მაქვს. ამიტომ მინდა, მათ დავუბრუნდე და ახალი ყურით მოვუსმინო. ამ ალბომზე იმდენი ხანი ვმუშაობდი, რომ ბოლოს გვერდით გადავდე. ახლა კი მზად ვარ, სტუდიაში დავბრუნდე. დავიწყებ, ცოტა მადროვეთ!” – ამბობდა მომღერალი.
ნახეთ რიანას Anti-ს საიუბილეო პოსტი:
