კენდრიკ ლამარმა წლის საუკეთესო ჩანაწერისთვის გრემი მიიღო, რის შემდეგაც Crypto.com Arena-ს სცენაზე, წლის საუკეთესო სიმღერის (Not Like Us) კატეგორიაში გრემის მისაღებად კვლავ წარდგა.
ჯილდო კენდრიკ ლამარს ლეგენდარულმა მუსიკოსმა დაიანა როსმა გადასცა და თავისი ემოციური გამოსვლით მსოფლიოში მიმდინარე მოვლენებსაც შეეხო.
„როგორ შევინარჩუნოთ ბალანსი დღესასწაულსა და მწუხარებას შორის? მაშინაც კი, როცა ჩვენი სული განსაცდელშია, მუსიკა სახლში გვაბრუნებს. თქვენ მარტო არ ხართ! ჩვენ თქვენს გვერდით ვდგავართ, ჩემი გული თქვენთან არის.“ – მიმართა დაიანა როსმა აუდიტორიას.
კენდრიკ ლამარი გრემის მიღებისას სიტყვით გამოვიდა და დასავლეთ სანაპიროს ლეგენდარული არტისტების მიმართ პატივისცემა გამოხატა: „მინდა, პატივი მივაგო დასავლეთ სანაპიროს ყველა შემსრულებელს: G Malone, Problem, Bad Lucc, K-Bo, Daylyt… ესენი ის ადამიანები არიან, რომლებმაც შთამაგონეს გავმხდარიყავი ის, ვინც დღეს ვარ. და ბოლოს, არაფერია უფრო ძლიერი, ვიდრე რეპი. რაც არ უნდა იყოს, ჩვენ ვართ კულტურა.“
სიტყვით გამოსვლის ბოლოს, კენდრიკ ლამარმა ახალგაზრდა არტისტებისთვის მნიშვნელოვანი გზავნილი გააჟღერა:
„ყველა ახალბედა არტისტს მინდა ვუთხრა, – როგორც ჩემმა ძმამ, Punch-მა თქვა, უბრალოდ, ვიმედოვნებ, რომ პატივს სცემთ ამ ხელოვნებას. ეს თქვენ მიგიყვანთ იქ, სადაც უნდა იყოთ.“ – აღნიშნა კენდრიკ ლამარმა.
2 თებერვალს გამართულ გრემის დაჯილდოებაზე ნომინაციებით ბიონსე ლიდერობდა, ის 11 სხვადასხვა კატეგორიაში იყო წარდგენილი. შვიდ-შვიდი ნომინაციით მეორე ადგილზე იყვნენ Charli XCX, ბილი აილიში, თავად კენდრიკ ლამარი და Post Malone.
