მადონა აშშ-ის პრეზიდენტის, დონალდ ტრამპის აქტივობების შესახებ საკუთარ შეხედულებას აზიარებს. პოპის დედოფალი ამჯერად თეთრი სახლის ოფიციალურ ანგარიშზე გავრცელებულ პოსტს გამოეხმაურა, სადაც ჟურნალ Time-ის ყალბ ყდაზე სწორედ აშშ-ის პრეზიდენტია გამოსახული მეფის გვირგვინითა და წარწერით: „დღეგრძელობა მეფეს”.
პოსტმა, გასაგები მიზეზების გამო, კრიტიკა დაიმსახურა მათი მხრიდან, ვინც მასში თეთრი სახლის ირონია ამოიცნო, იმ გარემოებების გათვალისწინებით, რომელშიც ამერიკა დაარსდა. მათგან ერთ-ერთი მადონა იყო, რომელიც პოსტს საკუთარ სოციალურ ქსელში გამოეხმაურა.
„ვფიქრობდი, რომ ეს ქვეყანა ევროპელებმა ააშენეს, რომლებიც მეფის მმართველობას გამოექცნენ, რათა შეექმნათ ახალი სამყარო, რომელსაც ხალხი მართავდა. ახლა კი გვყავს პრეზიდენტი, რომელიც თავს მეფეს ეძახის. თუ ეს ხუმრობაა, მე არ მეცინება,” – წერს მომღერალი.
ეს არ არის პირველი შემთხვევა, როცა მადონა ნეგატიურად გამოეხმაურა ტრამპის ადმინისტრაციის მიერ გადადგმულ ნაბიჯებს. 2017 წელს, ტრამპის პირველი ინაუგურაციის შემდეგ, მუსიკოსმა ვაშინგტონის ქალების მარშზე შეკრებილ 500 000-ზე მეტ ადამიანს მიმართა.
„კეთილი იყოს თქვენი მობრძანება სიყვარულის რევოლუციაზე, ჩვენს ამბოხსა და ქალების უარზე, მიიღონ ეს ტირანია, სადაც არა მხოლოდ ქალები არიან საფრთხეში, არამედ ყველა მარგინალიზებული ადამიანი; სადაც უნიკალური განსხვავებულობა ყოფნა შეიძლება დანაშაულად ჩაითვალოს. სიბნელის ეს საზარელი მომენტი გახდა საჭირო ჩვენს გამოსაღვიძებლად.”
ცოტა ხნის წინ კი მადონა გამოეხმაურა ტრამპის ბრძანებებს, რომლებიც მრავალფეროვნებისა და თანასწორობის, ასევე LGBTQIA+ თემის დაცვის წინააღმდეგ არის მიმართული.
„ძალიან რთულია, უყურო, როგორ გვართმევს ჩვენი ახალი მთავრობა ყველა იმ თავისუფლებას, რომლისთვისაც წლების განმავლობაში ვიბრძოლეთ და მოვიპოვეთ. არ შეწყვიტოთ ბრძოლა!”
