ქართულ მუსიკალურ ინდუსტრიას ახალი ლეიბლი – Break Records შეემატა. მისი დაარსება მუსიკოსებსა და მსმენელებს დამფუძნებლებმა სოციალური ქსელებიდან ამცნეს და პირველი ღონისძიებაც დააანონსეს.
Break Records-ის საქმიანობასა და გეგმებზე Billboard საქართველო ლეიბლის დამფუძნებელს ესაუბრა.
გიორგი ჩაგელიშვილი:
„მრავალი წელია, მუსიკასთან ახლო კავშირი მაქვს, კონკრეტულად, ფროდაქშენის ნაწილში – აქტიურად ვარ ჩართული მიქსინგისა და მასტერინგის საკითხებში დ,ა აქედან გამომდინარე, მომივიდა იდეა, რომ ამ ყველაფრისთვის ლეიბლის სახე მიმეცა. თან, მანამდე მრავალი წელი მარკეტინგის სფეროში ვმუშაობდი და, შეიძლება ითქვას, რომ ეს ორი სფერო გავაერთიანე. ამის მთავარი შთაგონება კი იყო ფაქტი, რომ ძალიან ბევრ არტისტს ვხედავ გარშემო, რომელთაც სჭირდებათ ის სერვისები, რასაც ჩვენი ლეიბლი გააკეთებს. ასე რომ, უფრო არტისტების საჭიროებებიდან გაჩნდა ეს სურვილი. ჩვენ მაქსიმალურად ვცდილობთ, რომ მუსიკოსს საფიქრალი ჰქონდეს მხოლოდ მუსიკაზე, ყველაფერი დანარჩენი კი ჩვენ გავაკეთოთ. ეს იქნება სრული მომსახურება, რომელშიც შედის ხმის ჩაწერა, პროდაქშენი, პროდიუსინგი, დისტრიბუცია და პოპულარიზაცია. ასევე ვაპირებთ, რომ მუსიკოსებს კარიერის დაგეგმვასა და სტრატეგიების გაწერაშიც დავეხმაროთ. უკვე გვაქვს რამდენიმე არტისტთან მოლაპარაკება და სამომავლოდაც ვიცით, რომელ მუსიკოსებთან გვსურს თანამშრომლობა. ამ ეტაპზე მათ ვინაობას ვერ ვასახელებთ, თუმცა უახლოეს მომავალში, მას შემდეგ, რაც ოფიციალურად გავაფორმებთ ხელშეკრულებებს, მათ სახელებსაც გავამხელთ.“
უკვე ცნობილია Break Records-ის პირველი ღონისძიება – ბექა გოჩიაშვილის კონცერტი, რომელიც 8 მარტს Billboard Georgia Stage-ის სცენაზე შედგება.
„ჩვენი ლეიბლის ერთ-ერთი მიმართულება იქნება ივენთების ნაწილი და გაგვიმართლა, რომ შეგვიძლია პირველი ღონისძიება ბექა გოჩიაშვილთან ერთად გავაკეთოთ. ეს ჩვენთვის დიდი ფუფუნებაა და ამისთვის მადლობლები ვართ.”
