ანიმაციურმა სტუდია DreamWorks-მა განაცხადა, რომ მუშაობა მიმდინარეობს Shrek-ის მეხუთე ნაწილზე, რომელშიც ზენდეია ყველასათვის საყვარელი გმირის ქალიშვილის როლს შეასრულებს.
YouTube-ზე გამოქვეყნებულ თიზერში ზენდეია ახალი ანიმაციური პერსონაჟის გამხმოვანებლის ამპლუაშია. კადრებში ჩანს, როგორ უყურებს მაიკ მაიერსის მიერ გახმოვანებული შრეკი ჯადოსნურ სარკეში ვიდეოებს. როცა შრეკი გადააწყდება საკუთარ რედაქტირებულ ფოტოს, სადაც ის არარეალურად დაკუნთული ჩანს, ზენდეიას პერსონაჟი მას რეპლიკით მიმართავს. ამავე სცენაში ჩნდება კამერონ დიაზის მიერ გახმოვანებული ფიონა.
Shrek 5-ში ბრუნდება ედი მერფიც, რომელიც ისევ გაახმოვანებს შრეკის ცნობილ ოთხფეხა მეგობარ ვირს. DreamWorks-ის ინფორმაციით, ზღაპრული ისტორიის ახალი თავი კინოთეატრებში 2026 წლის შობისთვის გამოვა. ცნობილი ანიმაციის პირველი ნაწილი 2001 წელს გამოვიდა. დიდი პოპულარობისა და კომერციული წარმატების შემდეგ მას ახალი ნაწილებიც მოჰყვა – Shrek 2 (2004), Shrek 3 (2007) და Shrek Forever After (2010).
ზენდეია პროექტში ჩართვამდე, წლების განმავლობაში ამ ანიმაციური ფრენჩაიზის გულშემატკივარი იყო. 2017 წელს მან ტვიტერზე დაწერა: „შრეკს მოზრდილობაშიც ზედმეტად ხშირად ვუყურებ.“ ამ ტვიტის ე.წ. სქრინშოტი Shrek-ის ოფიციალურმა Instagram-მაც გააზიარა. მეხუთე ნაწილის გამოცხადების დღეს ანიმაციის ინსტაგრამის ანგარიშზე გამომწერებს ეს პოსტი კიდევ ერთხელ შეახსენეს.
Shrek 5-ში შემოქმედებით გუნდთან გაერთიანებამდე ზენდეიამ კრიტიკოსების აღიარება მოიპოვა ლუკა გუადანინოს ფილმ Challengers-ში, ტაში დანკანის როლის შესრულებისათვის. როლისათვის ვარსკვლავმა 2025 წლის ოქროს გლობუსის საუკეთესო მსახიობი ქალის ნომინაცია მიიღო, თუმცა ჯილდო The Substance-ის ვარსკვლავმა, დემი მურმა მოიპოვა. მსახიობი ასევე ბრუნდება სერიალში Euphoria, რომლის მესამე სეზონის გადაღებებიც წელს დაიწყო.
იხილეთ Shrek 5-ის თიზერი:
