2025 წლის ოსკარების ცერემონია შთამბეჭდავად გაიხსნა – Wicked-ის ვარსკვლავებმა, არიანა გრანდემ და სინთია ერივომ The Wizard of Oz-ზე დაფუძნებული ფილმების სიმღერების მიქსი შეასრულეს.
გრანდე სცენაზე მბზინავი წითელი კაბით გამოვიდა, რომელიც ლეგენდარული წითელი ფეხსაცმლის ასოციაციას იწვევდა. მან იმღერა უკვდავ კლასიკად ქცეული Somewhere Over the Rainbow – 1939 წლის The Wizard of Oz-ის სიმღერა. მას შემდეგ, რაც არიანა გრანდემ სცენა დატოვა, აუდიტორიის წინაშე სინთია ერივო გამოჩნდა. ერივომ შეასრულა Home 1978 წლის ფილმიდან The Wiz. ეს არის კომპოზიცია, რომელიც თავდაპირველად დიანა როსმა თავისი შესრულებით აქცია პოპულარულ სიმღერად.
Oz-ის ორი საკულტო ფილმისადმი მიძღვნილი მუსიკალური ნომრების შემდეგ, გრანდე და ერივო სცენაზე კვლავ გაერთიანდნენ და შეასრულეს Wicked-ის ცნობილი ჰიმნი – Defying Gravity. თუმცა, ამჯერად სცენის მთავარი ვარსკვლავი ერივო იყო. მან ბროდვეის საკულტო სიმღერა შთამბეჭდავი ვოკალური ოსტატობით შეასრულა. როცა მან დამაგვირგვინებელი ნოტი აიღო, დოლბის თეატრში მსმენელებმა ცრემლები ვერ შეიკავეს – მათ შორის იყო მისი თანავარსკვლავი მიშელ იეოც, რომელიც კამერებმა ცრემლის მოწმენდის მომენტში დააფიქსირეს.
Wicked-მა წლევანდელ ოსკარებზე 10 ნომინაცია მიიღო, მათ შორის საუკეთესო მსახიობი ქალის კატეგორია (სინთია ერივო) და საუკეთესო მეორეხარისხოვანი მსახიობი ქალის ნომინაცია (არიანა გრანდე). 2024 წლის ბოლოს, Wicked-მა გადაასწრო Mamma Mia!-ს და გახდა ყველაზე შემოსავლიანი კინოადაპტაცია ბროდვეის მიუზიკლების ისტორიაში.
