ქართველი მუსიკოსის, ლიზა კერესელიძის მონაწილეობით ჰამბურგში მუსიკალური წარმოდგენა გაიმართა, სახელწოდებით Ein Altes Neugeborenes (მოხუცი ახალშობილი). წარმოდგენა დაეფუძნა მიკელა მურგიას 2018 წლის ნაწარმოებს “როგორ გავხდეთ ფაშისტი”. სცენაზე სწორედ წიგნის ფრაგმენტები გაცოცხლდა, რადგან, ავტორების თქმით, მსოფლიოში შექმნილი ვითარებიდან გამომდინარე, ტექსტი დღესაც აქტუალური და მტკივნეულია.
წარმოდგენა საქართველოში ამჟამად განვითარებულ მოვლენებს ეხმაურება. ამ კავშირის ხაზგასასმელად კი მაყურებელი ფონად მიმდინარე საპროტესტო აქციების კადრებს ხედავდა. სრულად ქართულ ენაზე იყო სასაუბრო ტექსტიც, ხოლო ლიბრეტო ინგლისურ, იტალიურ და რუსულ ენებზე შესრულდა. წარმოდგენის კულმინაცია კი საქართველოს დროშის, როგორც შეუპოვრობის სიმბოლოს აღმართვა იყო.
