ცნობილმა კომპოზიტორმა ჰანს ციმერმა ფილმ Dune-ის მეორე ნაწილისთვის წელს ოსკარი ვერ მიიღო, რაზეც მოგვიანებით აღნიშნა, რომ „ეს უბრალოდ სულელური წესის“ გამო მოხდა.
გერმანელი კომპოზიტორი უკვე 35 წელზე მეტია, ჰოლივუდის ფილმებისთვის საუნდტრეკებს ქმნის. ხანგრძლივი კარიერის განმავლობაში, მან ოსკარი ორჯერ მიიღო. აღსანიშნავია რომ ჰანს ციმერი 12-ჯერ იყო ოსკარზე ნომინირებული, საუკეთესო ორიგინალური საუნდტრეკისთვის ჯილდო კი პირველად 1995 წელს The Lion King-ისთვის და მეორედ 2022 წელს Dune-ისთვის მოიპოვა.
რეჟისორ დენი ვილნევის ფილმი Dune: Part Two-ს 2024 წლის მარტში გამოვიდა. გულშემატკივრები ვარაუდობდნენ, რომ ჰანს ციმერი ოსკარს აიღებდა. ოქტომბერში Variety-ს მიერ გავრცელებული ინფორმაციის თანახმად, კომპოზიტორის მიერ შექმნილი საუნდტრეკი აკადემიის ჯილდოზე წარდგენას ვერ შეძლებდა, რადგან მან „აკადემიის მიერ დადგენილ ლიმიტს გადააჭარბა.“
აკადემიის წესების მიხედვით: „საუნდტრეკი არ უნდა შეიცავდეს 20%-ზე მეტ უკვე არსებულ თემებს ან წინა თემის მუსიკალურ ელემენტებს.“
ჰანს ციმერის ნაწარმოებში კი, ფილმისთვის Dune: Part Two, გამოყენებული იყო საკვანძო ელემენტები და მოტივები 2021 წლის ოსკაროსანი Dune-ის საუნდტრეკიდან. სწორედ ამის გამო, მისი ნამუშევარი აკადემიის მიერ არაკვალიფიციურად გამოცხადდა და ოსკარზე წარდგენა ვერ შეძლო.
მიუხედავად იმისა, რომ ფილმის რეჟისორი დენი ვილნევი და შემოქმედებითი გუნდი ჰანს ციმერის აღიარებისთვის აქტიურად იბრძოდა, საბოლოოდ, კომპოზიტორის მუსიკამ ოსკარზე დისკვალიფიკაცია მიიღო და კენჭისყრის ბიულეტენში ვერ მოხვდა. ყველაფრის მიუხედავად, 2 მარტს, ოსკარის დაჯილდოებაზე ფილმმა ხუთი ნომინაცია მიიღო, საუკეთესო ხმის დიზაინისა და საუკეთესო ვიზუალური ეფექტების ნომინაციაში კი ჯილდო მოიპოვა.
ახალ ინტერვიუში, Happy Sad Confused პოდკასტთან საუბრისას, ჰანს ციმერი ამ თემას შეეხო, როცა წამყვანმა ჯოშ ჰოროვიცმა ჰკითხა, იყო თუ არა ეს დისკვალიფიკაცია მისთვის მტკივნეული.
„არა, ეს არ არის მტკივნეული წერტილი ჩემთვის. ეს უბრალოდ სულელური წერტილია – როგორ უნდა იყოს მტკივნეული? მე არ მომცეს კვალიფიკაცია, რადგან პირველი ფილმიდან არსებული მასალა მეორე ფილმშიც გამოვიყენე. თუმცა ეს ჩვეულებრივი გაგრძელება არ არის, ეს ერთი საერთო ისტორიის დასასრულია, ერთი მთლიანი ნარატივის ნაწილი.“ – აღნიშნა კომპოზიტორმა.
„მათი აზრით, უნდა წავსულიყავი, ყველა პერსონაჟის თემა ამომეშალა და სრულიად ახალი დამეწერა? ეს უბრალოდ სულელური წესია. რაც არ მინდოდა, იყო მისი გამუდმებული განხილვა და წუწუნი ამაზე.“ – დაამატა ჰანს ციმერმა.
„ისტორია ზუსტად იმ წამიდან გრძელდება, სადაც პირველი ფილმი მთავრდება. ჩვენ ისევ იმავე ამბავს ვყვებით, იმავე პერსონაჟებთან ერთად. ახალი თემების დაწერა სულელური და არაკინემატოგრაფიული იქნებოდა, ნაცვლად იმისა, რომ არსებული თემები განმევრცო.” – აღნიშნა ჰანს ციმერმა.
კომპოზიტორი დენი ვილენევთან ერთად ფილმის შემდეგ სერიაზე Dune: Messiah-ზე მუშაობას გეგმავს, რომლის გადაღებაც 2025 წლის შუა პერიოდისთვის დაიწყება.
