DEENA ახალ სიმღერას აანონსებს, სახელწოდებით „გრიგალი”. სოციალურ ქსელში მუსიკოსი მოკლე ვიდეოებს აზიარებს, რომელთაც ერთი რამ აერთიანებთ – სტიქიური მოვლენები. ყველა მათგანის აღწერაში კი ვკითხულობთ: „სოლიდარობა სტიქიით დაზარალებულებს.” კომპოზიცია პირველ აპრილს გამოვა.
DEENA:
„სიმღერა ეძღვნება სტიქიურ მოვლენებს: გრიგალს, ზვავს, დიდთოვლობას, თქეშს, ქარბუქებს, სეტყვას, დასეტყვილ ვენახებს. ასევე იმასაც, თუ რას იწვევენ ჩვენში ეს მოვლენები. ხანდახან თავად ადამიანი შეიძლება იყოს გრიგალი, ხანდახან კი – შენი ქვეყნის მდგომარეობა. გრიგალში ყველაზე რთული ის არის, რომ მის დროს ნავიგაცია ძნელია, ყველანაირი კურსი და საერთოდ ყველაფერი ირევა. ეს სტიქიაა, რომელიც გაუძლურებს. ბევრია ასეთი სტიქია დღეს ჩვენთან და, მეორე მხრივ, ჩემთვის ბევრი რამაა სტიქიური. სტიქია გიმორჩილებს. მის წინაშე უძლური ხარ და მას ვერ აკონტროლებ. სტიქიურ მოვლენებში კი თოვლი მათთვის უფრო მაღალია, ვინც ღარიბია. რაც შეეხება ქვეყანას, ამ კრიზისში, რომელიც გამოწვეულია იმ მიმართულებით, რომლითაც ეს ქვეყანა პოლიტიკურად მიდის, ბევრ გრიგალს ველოდებით. ეს სიმღერა კი სიჩუმეა გრიგალის წინ.”
სიმღერის ავტორები თავად DEENA და ნიკა ფასური არიან, რომელიც ასევე ტრეკის პროდიუსერია. მიქსინგ/მასტერინგი ლუკა თელიას ეკუთვნის. მუსიკალურ ვიდეოზე კი ასევე DEENA-მ და გიორგი სოლომანაშვილმა იმუშავეს.
„გრიგალი” ერთ-ერთი სიმღერაა DEENA-ს მომავალი LP-დან, სახელწოდებით Satellites. ალბომში შემავალი კომპოზიციები თანდათან გამოქვეყნდება.
