კერძო ტაქსის მძღოლმა სახელად პაულამ 23 მარტს ინსტაგრამზე პოსტი გააზიარა. მისი თქმით, ჰარი სტაილსმა ლონდონში მისი მანქანით იმგზავრა, თუმცა, როგორც აღმოჩნდა, მძღოლმა თავდაპირველად არტისტი ვერც კი იცნო. მოგვიანებით მან პოპვარსკვლავთან გადაღებული სელფი შემდეგი წარწერით გამოაქვეყნა: „დღეს გზაში ერთი ახალგაზრდა კაცი ავიყვანე. საუბარი დავიწყეთ და ვუთხარი, რომ მისი ხმა ძალიან ჰგავდა ჰარი სტაილსის ხმას, მან მიპასუხა: ეს იმიტომ, რომ ჰარი სტაილსი ვარ… ის მართლაც ძალიან მეგობრული ადამიანი აღმოჩნდა!“ – წერს პაულა.
ფოტოზე პაულა მძღოლის ფანჯრიდან იყურება, ხოლო ჰარი სტაილსი კამერაში იღიმის. 28 მარტს, პაულამ ფოტო კვლავ გააზიარა სთორიში, წარწერით: „ჰარი სტაილსი ლონდონამდე წავიყვანე.”
როგორც ჩანს, ჰარი სტაილსი იაპონიაში ყოფნის შემდეგ თავის სამშობლოში დაბრუნდა. გრემის მფლობელმა არტისტმა 2 მარტს ტოკიოს მარათონში მიიღო მონაწილეობა, სადაც 37 000-ზე მეტი მონაწილიდან 6 010-ე ადგილი დაიკავა. ტოკიოდან ლონდონამდე ჰარი სტაილსი სხვადასხვა ქალაქებში მოგზაურობდა, თუმცა ერთ-ერთი ადგილი, სადაც ის უახლოეს მომავალში არ ჩავა, ლას-ვეგასია. მიუხედავად გავრცელებული ხმებისა, ჰარი სტაილსი 2025 წელს The Sphere-ში რეზიდენციას არ გეგმავს.
13 მარტს ამ ჭორებს საბოლოოდ დაუსვა წერტილი The Sphere-ის წარმომადგენელმა, რომელმაც Billboard-ს ექსკლუზიურად განუცხადა: „სიმართლის გასარკვევად უნდა ითქვას, რომ ჰარი სტაილსის Sphere-ში წარდგენის გეგმა არც არასდროს არსებობდა.“
აღსანიშნავია, რომ ჰარი სტაილსს 2023 წლის შემდეგ ტურნე არ ჰქონია. არტისტმა ორ წლიანი გლობალური Love On Tour წარმატებით დაასრულა. მისი ბოლო ალბომი Harry’s House 2022 წელს გამოვიდა, რომელშიც ჰიტი As It Was-ია შესული. ეს უკანასკნელი Billboard Hot 100-ის სათავეში 15 კვირის განმავლობაში იმყოფებოდა, ხოლო ორი კვირა – Billboard 200-ში ლიდერობდა. თავად ალბომმა Harry’s House-მა კი გრემის დაჯილდოებაზე წლის საუკეთესო ალბომის ჯილდო დაიმსახურა.
