სელენა გომესი ბენი ბლანკოს მისთვის მაკიაჟის გაკეთების ნებას რთავს

6 მარტს სელენა გომესმა ინსტაგრამზე სახალისო ვიდეო გამოაქვეყნა, სადაც   ენთუზიაზმით სავსე  მისი საქმრო მას Rare Beauty-ს პროდუქციის გამოყენებით მაკიაჟს უკეთებს.

სახალისო ვიდეოში ბენი ბლანკო  თავიდან დიდად თავდაჯერებული არ ჩანს. მას კამერაც კი დაუვარდა, ფუნჯის რამდენიმე მოსმის შემდეგ კი გომესმა დაამატა: „ეს უკვე კარგად გამოგდის, საყვარელო! ვამაყობ შენით.“

თუმცა შემდეგ ბლანკომ პიგმენტური თხევადი ბრონზერის გამოყენებისას მაინც ვერ გაართვა ამ საქმეს თავი და სელენას უთხრა: „როცა შენ აკეთებ, იმდენად კარგად გამოგდის!“ 

რამდენიმე ფენა თხევადი პუდრის,  ჰაილაითერის, ტუჩის ზეთის და სელენა გომესის არაერთი უკმაყოფილო სახის გამომეტყველების შემდეგ, ბლანკო საბოლოოდ საკუთარი ნამუშევრით კმაყოფილი დარჩა. „მართლა მგონია, რაღაცას მივაგენი, თუ ამ ორს ერთად შევურევ, ჩემი აზრით, საკმაოდ კარგად გამოიყურები. ძალიან სექსუალური ხარ.“ – მიმართა მან სელენას.

გომესის სახის გამომეტყველებით თუ ვიმსჯელებთ, მისი აზრი დიდად არ დაემთხვა ბლანკოს შეფასებას, მაგრამ წყვილი ამ პროცესით საკმაოდ კარგად გაერთო. 

სელენა გომესის ამ პოსტზე Rare Beauty-ს ოფიციალური ანგარიშის ხუმრობანარევი კომენტარი გამოჩნდა: „@bennyblanco მიღებული ხარ სამსახურში.“

წყვილმა მაკიაჟის გაკეთებას თავი ვერ გაართვა, თუმცა, სულ ცოტა ხნის წინ, გაცილებით წარმატებით ითანამშრომლეს ერთობლივ ალბომზე სახელწოდებით I Said I Love You First. ალბომში 14 სიმღერა შედის, პროექტის გამოსვლა კი 21 მარტს იგეგმება. ალბომში შესული სიმღერებიდან უკვე გამოცემული სინგლებია Scared of Loving You და Call Me When You Break Up. კვირის დასაწყისში კი სელენა გომესმა ახალი პროექტის სიმღერების სრული სიაც გაამხილა.

ცოტა ხნის წინ Apple Music 1-ის ეთერში, ზეინ ლოუსთან ინტერვიუში, სელენა გომესმა ახალი პროექტი ასე შეაფასა: „ეს არის იმის ჩვენება, თუ ვინ ვართ ჩვენ ერთად, როგორ შევქმენით ეს ნამუშევარი, როგორ გვიყვარდა პროცესი და როგორ გვიყვარს ერთმანეთი.”