ქართველმა არტისტმა DEENA-მ (ელენე გიგანი) ახალი სიმღერა, სახელწოდებით „გრიგალი” გამოუშვა. როგორც მუსიკოსი Billboard Georgia-სთან საუბრისას აღნიშნავს, სიმღერა ეძღვნება სტიქიურ მოვლენებს და იმ ემოციებს გადმოსცემს, რომლებსაც ეს მოვლენები თავად არტისტში აღძრავს.
DEENA:
„ხანდახან თავად ადამიანი შეიძლება იყოს გრიგალი, ხანდახან კი – საკუთარი ქვეყნის მდგომარეობა. გრიგალში ყველაზე რთული ის არის, რომ მის დროს ნავიგაცია ძნელია, ყველანაირი კურსი და საერთოდ ყველაფერი ირევა.”
ტრეკის ავტორები DEENA და ნიკა ფასური არიან, რომელიც ამავდროულად ნამუშევრის პროდიუსერიც არის. მიქსინგსა და მასტერინგზე ლუკა თელიამ იმუშავა. „გრიგალი” ვიზუალურ ნამუშევართან ერთად გამოქვეყნდა, რომლის ავტორები თავად არტისტი DEENA და გიორგი სოლომანაშვილი არიან.
DEENA ქართველი არტისტია, რომელმაც მუსიკალური კარიერა 16 წლის ასაკში, პანდემიის დროს დაიწყო. 2021 წლიდან თანამშრომლობს ქართულ მუსიკალურ ლეიბლთან, სახელწოდებით Didube Records. სწორედ ამ თანამშრომლობის ფარგლებში, პროდიუსერ ნიკა ფასურთან ერთად, 2022 წელს Deena-მ გამოუშვა სადებიუტო ალბომი LOW LOVE.
DEENA-ს მუსიკა ჟანრობრივი მრავალფეროვნებით გამოირჩევა. ის აერთიანებს პოპს, თრეფს და R&B-ს.
