იაპონიის მუსიკალური დაჯილდოების (MAJ) პირველი ცერემონია, რომელიც ამავდროულად ქვეყნის ყველაზე დიდი დაჯილდოებაა, მაისში კიოტოში შედგება. ღონისძიებაზე წარმოდგენილი იქნებიან არტისტები და ნამუშევრები, რომელთაც განსაკუთრებული ყურადღება დაიმსახურეს 2024 წლის 29 იანვრიდან 2025 წლის 26 იანვრამდე პერიოდში. გამარჯვებულები 60-ზე მეტ კატეგორიაში გამოვლინდებიან, რომელთა შორისაც ექვსი მთავარი ნომინაციაა: წლის სიმღერა, წლის არტისტი და სხვ. 13 მარტს გამოქვეყნდა ვრცელი სია, საიდანაც საბოლოოდ თითოეულ კატეგორიაში ხუთი ნომინანტი უნდა აირჩეს.
ამჯერად ავიღოთ წლის სიმღერის კატეგორია იმ 256 ნამუშევრით, რომელიც ამ ნომინაციაში წარსადგენად იბრძოლებს და შევადაროთ ბილბორდ იაპონიის Hot 100-ის ჩარტს (BBJ).
წლის სიმღერაზე წარდგენილთა სია დაფუძნებულია ორიგინალურ ჩარტზე, რომელიც, თავის მხრივ, მოიცავს Japan Hot 100-ის ექვს კრიტერიუმის. პირველი, რაც MAJ-სა და BBJ-ს საერთო აქვთ, ეს არის შეფასების კრიტერიუმებში სტრიმინგის დიდი წილი. ეს ტენდენცია კი აჩვენებს, რომ ორივე მათგანი აცნობიერებს, რომ დღეს მუსიკის მოხმარების ძირითადი გზა სწორედ სტრიმინგია.
MAJ-ის შემთხვევაში დისკების გაყიდვის წილი 10%-ს შეადგენს, ხოლო BBJ-ში ეს მაჩვენებელი 2%-ია. აღსანიშნავია, რომ გლობალური ბაზრის ფონზე იაპონიაში CD ბაზარი ჯერ კიდევ ფართოა, შესაბამისად, აღნიშნულ იაპონურ ტენდენციას დაჯილდოება მეტ მნიშვნელობას ანიჭებს. მსგავსი შემთხვევაა მუსიკის ჩამოტვირთვის მხრივაც. ჩამოტვირთვებს MAJ-ში 7%-იანი წილი უკავია, როცა BBJ-ში ის უფრო ნაკლები – 4%-ია. ეს კი აჩვენებს, რომ MAJ-ის ყველაზე დამახასიათებელი შტრიხი იმგვარად მოწყობილი სისტემაა, რომელიც მხედველობაში იღებს იაპონური ბაზრის თავისებურებებს.
რაც შეეხება გენდერულ გადანაწილებას, MAJ-ის შემთხვევაში 61% კაც არტისტებს უკავიათ, 30% – ქალებს, ხოლო 9%-ს შერეული მუსიკალური აქტები წარმოადგენს. BBJ-სთან შედარებით, აქ კაცი არტისტების წილი ოდნავ დაბალი, ქალი არტისტებისა კი შედარებით მაღალია. განსხვავებაა ასევე ის, რომ ჩარტში უფრო მეტია შერეული მუსიკალური აქტების წილი, რაც ძირითადად განპირობებულია იმით, რომ მასში დუეტ YOASOBI-ს (ქალი და კაცი არტისტების დუეტი) ბევრი სიმღერა შედის.
MAJ-ის შემთხვევაში 84%-ს იაპონელი არტისტები შეადგენენ, რაც ოდნავ დაბალია BBJ-სთან შედარებით (89%). თუმცა MAJ-ში მეტია სამხრეთ კორეული სიმღერების წილი (14%, BBJ-ის 10%-თან შედარებით). იაპონიისა და სამხრეთ კორეის გარეთ ერთადერთი არტისტები არიან: მერაია კერი, OneRepublic და ტეილორ სვიფტი – ყველა მათგანი აშშ-დან. ასევე გვხვდება სხვადასხვა ქვეყნის არტისტების ორი კოლაბორაცია: Rosé და ბრუნო მარსი და BE:FIRST X ATEEZ
როგორც MAJ-ის, ასევე BBJ-ის შემთხვევაში ჟანრების უმეტესობა პოპი და როკია. MAJ-ის 14%-ს კი K-პოპი იკავებს.
აღსანიშნავია ისიც, რომ BBJ-ის 43% დაკავშირებულია სხვა პროდუქტებთან, როგორებიცაა: ანიმე – 19%, სერიალები – 13% და რეკლამები – 11%. MAJ-ს კი უფრო ფართო სპექტრი აქვს სიმღერებისა, რომლებიც დამოუკიდებელია სხვა პროდუქტებთან კავშირებისგან.
იაპონიის მუსიკალური დაჯილდოებისა და ბილბორდ იაპონიის Hot 100-ის შედარების შედეგად გამოკვეთილი ტენდენციები აჩვენებს, რომ MAJ შეიცავს კარგ ბალანსს მრავალფეროვანი კრიტერიუმებისა, რათა ასახოს მეინსტრიმ მუსიკის ფართო სპექტრი იაპონიაში. ფაქტი, რომ დაჯილდოება უპირატესობას ანიჭებს საზომებს, რომლებიც იაპონური მუსიკალური ბაზრის უნიკალურ თავისებურებებს ასახავს – როგორებიცაა, მაგალითად, დისკების გაყიდვა და მუსიკის ჩამოტვირთვა – მისი მთავარი განმასხვავებელი ნიშანი აღმოჩნდა ბილბორდის ჩარტებისგან.
ახლა უკვე საინტერესოა იმის ნახვა, თუ როგორ მოახდენს MAJ-ის სტრუქტურა გავლენას მუსიკალური ბაზრის მომავალზე და იაპონური მუსიკის გავრცელებაზე მსოფლიოში. დაჯილდოების ნომინანტთა საბოლოო სია 17 აპრილს გამოქვეყნდება. ცერემონია კი 21 და 22 მაისს შედგება.
