ინგლისური საკულტო პანკჯგუფის, Sex Pistols-ის ფანებს დიდი იმედები აღარ უნდა ჰქონდეთ მათი ოცნების ახდენის, რომ ჯგუფი კვლავ ჯონ ლაიდენთან ერთად იხილონ. ამის შესახებ თავად მუსიკოსმა განაცხადა.
Sex Pistols-ის ტურნეს შესახებ ამბავი 2024 წელს გავრცელდა, როცა პირველად გამოცხადდა, რომ ბენდი კვლავ გაერთიანდებოდა თავდაპირველი წევრებით: სტივ ჯონსი, პოლ კუკი და გლენ მეტლოკი. თუმცა რაც შეეხება ვოკალისტს, ლაიდენის ნაცვლად, ბენდის სოლისტი ფრენკ კარტერი იქნებოდა. შედეგად, ჯგუფის ამჟამინდელ ვერსიას ოფიციალურად დაერქვა Sex Pistols Featuring Frank Carter.
აღნიშნულ შემადგენლობასთან დაკავშირებით ჯონ ლაიდენი საკუთარი აზრის გამოთქმას არასდროს მორიდებია:
„როცა პირველად გავიგე, რომ Sex Pistols ტურნეს ჩემ გარეშე მართავდა, ამ ამბავმა ძალიან გამაბრაზა. ვიფიქრე, რომ ისინი სრულიად კლავენ იმ ყველაფერს, რაც Pistols-ში იყო, მისი მიზნისა და არსის ამოძირკვით,” – აღნიშნავდა ლაიდენი წინა ინტერვიუებში.
ახლა კი მუსიკოსი იმ მოსაზრებებს გამოეხმაურა, იყო თუ არა შესაძლებელი, რომ გაერთიანებულ ჯგუფში მიკროფონთან სწორედ ლაიდენი ეხილათ. Pistols-ის ყოფილი სოლისტის თქმით, ბენდის წევრებთან მისი იურიდიული უთანხმოების გამო (დისნეის 2022 წლის სერიალში მათი სიმღერების გამოყენების თაობაზე), ფანების ამ ოცნების რეალიზება შეუძლებელია.
„არასდროს… მას შემდეგ, რა სიბინძურეც მათ ჩაიდინეს. მათ მთელი კონტენტი მოკლეს, ან ყველაფერი გააკეთეს ამისთვის და მთელი ეს ამბავი ნაგვად და ბავშვურობად აქციეს, რაც სრულიად მიუღებელია. ბოდიში, მაგრამ ამ ყველაფერს დახმარების ხელს ვერ გავუწვდი. ვწუხვარ, რომ ახლა Pistols მე ვარ და არა ისინი.”
ბოლო ინტერვიუში სტივ ჯონსმა განაცხადა, რომ ლაიდენი არ ყოფილა ჩართული დისკუსიებში ბენდის ახალი ვერსიის შესახებ და აღნიშნა, რომ, მათი ბოლო კონფლიქტის გათვალისწინებით, ჯგუფში მისი დაბრუნების მცდელობას აზრიც არ ექნებოდა.
„ჯონთან 2008 წლის ტურნეს შემდეგ არ მისაუბრია. მკაფიოდ მინდა ვთქვა, რომ მასზე ცუდს ვერაფერს ვიტყვი. ვფიქრობ, ის დიდებულია. ჩვენ საოცარი წარსული გვქონდა და ახლა უბრალოდ წინ მივდივართ. სულ ეს არის.”
ბენდის ახალი შემადგენლობის ტურნე 16 სექტემბერს დალასში დაიწყება და ერთი თვის შემდეგ, 16 ოქტომბერს, ლოს-ანჯელესში დასრულდება.
