ელტონ ჯონსა და ბრენდი კარლაილს ხანგრძლივი მეგობრობა აკავშირებთ, ახლა კი საერთო ალბომის Who Believes in Angels?-ის გარშემო გაერთიანდნენ. დუეტმა ალბომის ჩაწერა 2023 წლის ოქტომბერში დაიწყო და 20 დღეში დაასრულა. ჩანაწერები 4 აპრილს Interscope Records-ის ლეიბლით გამოვიდა. დუეტმა ალბომი ელტონ ჯონის ტექსტების დიდი ხნის თანა-ავტორ ბერნი ტაუპინთან და პროდიუსერ ენდრიუ უოთისთან ერთად შექმნა. Who Believes in Angels?-ში შედის უკვე გამოშვებული სინგლები: Swing for the Fences და Never Too Late.
„როცა ჩემი გამოსამშვიდობებელი ტურნე დასრულდა, უკვე ვიცოდი, რომ ბრენდისთან ერთად ახალ ალბომს შევქმნიდი. მინდოდა, სხვა მიმართულებით წავსულიყავი და რაიმე სრულიად ახალი გამეკეთებინა. ბრენდი ყოველთვის შთამაგონებდა, ჩვენი მეგობრობა ძალიან მჭიდროა. შინაგანად ვგრძნობდი, რომ ერთად რაღაც განსაკუთრებულს შევქმნიდით. Who Believes in Angels?-ზე მუშაობა საკმაოდ გამიჭირდა, ხშირად მეპარებოდა ეჭვი საკუთარ თავში, მაგრამ ბერნი ტაუპინთან და ენდრიუ უოთთან ერთად 20 დღეში 10 სიმღერა დავწერეთ. ეს ერთ-ერთი ყველაზე სასიამოვნო და ამაღელვებელი გამოცდილება იყო ჩემს ცხოვრებაში.“ – განუცხადა ელტონ ჯონმა Billboard-ს.
5 აპრილს დუეტი შაბათის ღამის შოუში მუსიკალური სტუმრის სტატუსით წარდგება, ხოლო 6 აპრილს ალბომის აღსანიშნად კონცერტს გამართავენ, რომელიც CBS-ის პირდაპირ ეთერში გავა. კონცერტი, სახელწოდებით An Evening With Elton John and Brandi Carlile ცოცხალ შესრულებებს, ალბომიდან ექსკლუზიურ კადრებს და ბრენდი კარლაილისა და ელტონ ჯონის მეგობრობის ისტორიებს მოიცავს.
მოუსმინეთ ელტონ ჯონისა და ბრენდი კარლაილის ალბომი Who Believes in Angels?
