ედ შირანმა ახალი მუსიკალური ეტაპი 4 აპრილს გამოცემული ახალი სინგლით, Azizam-ით დაიწყო. არტისტმა სიმღერა გასულ კვირას The Tonight Show-ში კიდევ ერთხელ დააანონსა. Azizam სპარსულად „ძვირფასო“-ს ნიშნავს, თავად სიმღერა კი პროდიუსერ ილია სალმანზადეს სპარსული ფესვებით არის შთაგონებული. ოთხგზის გრემის გამარჯვებული მუსიკოსი ამ სიმღერას რამდენიმე კვირა აანონსებდა, მარტის შუა რიცხვებში მან ინსტაგრამზე მცირე ფრაგმენტიც გააზიარა შემდეგი წარწერით: „ალბომი დასრულებულია. სინგლი მალე გამოვა. აღფრთოვანებული ვარ, როგორც ხედავთ.“
ედ შირანმა სიმღერა Azizam პირველად ნიუ-ორლეანის ქუჩებში, სოულ რებელსის სასულე ბენდის თანხლებით შეასრულა. ბოლო პერიოდში არტისტი აქტიურად მართავს ქუჩებში სპონტანურ პერფორმანსებს. წმინდა პატრიკის დღეს მან ბოსტონის ირლანდიურ პაბშიც იმღერა, ხოლო ნეშვილში, ბარ Tootsies-ში კი დაუგეგმავად შეასრულა საკუთარი კომპოზიციები.
The Tonight Show-ზე არტისტმა განაცხადა, რომ მისი შემდეგი ალბომის, Play-ს წამყვანი სინგლი Azizam იქნება.
ედ შირანს 2023 წლის ალბომ Autumn Variations-ის შემდეგ ახალი ალბომი არ გამოუცია, ამ უკანასკნელმა კი Billboard 200-ზე მე-4 ადგილი დაიკავა. მუსიკოსი ამჟამად ხანგრძლივი Mathematics Tour-ისგან ისვენებს, რადგან Azizam-ისა და Play-ის პოპულარიზაციას ეწევა, თუმცა ტურნე აპრილის ბოლოს კატარში განახლდება.
მოისმინეთ ედ შირანის ახალი სინგლი Azizam:
