Starring Georgia-ს ფარგლებში საქართველოში კონცერტს ჯასტინ ტიმბერლეიკი გამართავს. ქართველი გულშემატკივრის წინაშე მსოფლიო მეგავარსკვლავი 23 ივლისს „დინამო არენაზე” წარდგება. განცხადებას ამის შესახებ Black Sea Arena სოციალურ ქსელში ავრცელებს.
ერთი დღით ადრე Starring Georgia-მ ვიდეოანონსი გამოაქვეყნა, რომელშიც აღნიშნული კონცერტის თარიღი და ადგილი სახელდებოდა, თუმცა თავად ვარსკვლავის ვინაობა დღემდე საიდუმლოდ რჩებოდა.
მომღერლის, ავტორ-შემსრულებლის, პროდიუსერისა და მსახიობის – ჯასტინ ტიმბერლეიკის წარმატებული კარიერა უკვე 30 წელს ითვლის. მისი შემოქმედება ჯგუფ *NSYNC-თან ერთად დაიწყო, რომელსაც მსოფლიოს მასშტაბით 70 მილიონი ჩანაწერი აქვს გაყიდული. 2002 წლიდან კი მუსიკოსი უკვე სოლო კარიერას განაგრძობს, რომელიც ამ დრომდე 117 მილიონზე მეტ გაყიდულ ჩანაწერს ითვლის (54 მილიონზე მეტი ალბომი და 63 მილიონი სინგლი). ტიმბერლეიკს მიღებული აქვს „ემის” 4 და გრემის 10 ჯილდო. მისი ჰიტად ქცეული სიმღერა Can’t Stop the Feeling, 2017 წლის ანიმაციური ფილმიდან Trolls Holiday, წარდგენილი იყო ოსკარზე საუკეთესო ორიგინალური სიმღერის ნომინაციაში. მუსიკოსი თავადვე ახმოვანებს ცნობილი ანიმაციური ფილმის პერსონაჟს – ბრენჩს.
ახლახან ტიმბერლეიკმა რიგით მეექვსე სტუდიური ალბომი Everything I Thought It Was გამოსცა, რომელშიც შედის ისეთი ჰიტები, როგორებიცაა Selfish და No Angels. კარგად ნაცნობ რეპერტუართან ერთად „დინამო არენაზე” შეკრებილი გულშემატკივარი ტიმბერლეიკის ახალ ალბომში შესულ სიმღერებსაც მოისმენს.
ბილეთების გაყიდვა 8 აპრილს, 12 საათზე დაიწყება ბმულზე TKT.ge/JustinTimberlake. Starring Georgia-ს ერთგულ თანამგზავრებს კი, რომლებიც Starring Card-ის მფლობელები არიან, შესაძლებლობა ექნებათ, ისარგებლონ წინასწარი გაყიდვით და ლიმიტირებული რაოდენობის ბილეთები ერთი დღით ადრე, 7 აპრილს, 12 საათზე შეიძინონ.
