Maroon 5-ის ვოკალისტმა ადამ ლევინმა პოლ მაკარტნის რეაქცია გაიხსენა, როცა მისმა ბენდმა The Beatles-ის სიმღერის ქავერ ვერსიები შეასრულა.
ადამ ლევინი და გიტარისტი ჯეიმს ვალენტაინი The Howard Stern Show-ს სტუმრობდნენ, სადაც მათ 2014 წელს CBS-ის სპეციალურ სატელევიზიო შოუში The Night That Changed America: A Grammy Salute to the Beatles – The Beatles-ის სიმღერები შეასრულეს.
გარდა პოლ მაკარტნის და რინგო სტარისა, ამ საღამოზე ისეთი არტისტები წარდგნენ, როგორებიც არიან: ედ შირანი, ქეთი პერი, სტივი უანდერი, ჯონ ლეჯენდი და ალიშა ქისი. მუსიკოსებმა The Beatles-ის სიმღერების ქავერ ვერსიები შეასრულეს. ღონისძიება Maroon 5-ის გამოსვლით გაიხსნა, სადაც ბენდმა სიმღერები All My Loving და Ticket to Ride იმღერა.
„საშინლად შეშინებული ვიყავი,“ – უთხრა ჯეიმს ვალენტაინმა წამყვანს – ჰოვარდ სტერნს, ხოლო ადამ ლევინმა დაამატა: „ცხოვრებაში რამდენიმე ძალიან საშიში მომენტი მქონია, ეს კი აშკარად ერთ-ერთი მათგანი იყო. ვფიქრობდი, ჯანდაბა, მაპატიეთ, მაგრამ ზოგჯერ ასეთი მაგარი ვერ იქნები. იქ ხომ თვით რინგო სტარი და პოლ მაკარტნი იყვნენ.“
შემდეგ პოლს შევხვდი, მან მხარზე ხელი დამადო და მითხრა: „იცი, ჩვენ უკეთესად შევასრულეთ”. ვფიქრობდი, რომ ეს ძალიან სასაცილო იყო. გამეცინა და ვუთხარი: “ჰო, აბა რა, შენ ხომ პოლ მაკარტნი ხარ.” – იხსენებს ადამ ლევინი.
მომღერალი იხსენებს, რომ ეს შეხვედრა კიდევ უფრო უცნაურად გაგრძელდა, როდესაც რამდენიმე თვის შემდეგ, მაკარტნიმ ერთ-ერთ წვეულებაზე მას ბოდიში მოუხადა იმის გამო, რომ შესაძლოა, მის სიტყვებს რაიმე უსიამოვნება გამოეწვია.
„ამ საოცარმა ჟესტმა დაამსხვრია მითი, რომ თითქოს, შენი გმირები მიუწვდომელნი არიან. სინამდვილეში, ის არის სუფთა გულისა და ლამაზი სულის მქონე ადამიანი, რომელიც იმდენად გულისხმიერი აღმოჩნდა, რომ იფიქრა, იქნებ, რაღაცით ჩემი გრძნობები შელახა, თუმცა, რა თქმა უნდა, ასე არ ყოფილა.“ – დაამატა Maroon 5-ის ვოკალისტმა.
ადამ ლევინმა 7 აპრილს The Tonight Show-ში მონაწილეობით ასევე დაადასტურა, რომ 2025 წელს მუსიკალურ სცენაზე დაბრუნებას გეგმავს.
„მოარული ჭორები მართალია, თუმცა ყველაფერს ვერ გავამხელ. შეგვიძლია ვთქვათ, რომ თვის ბოლოს ახალი სინგლი გამოვა, რაც ძალიან მიხარია. ალბომის გამოსვლა ზაფხულში იგეგმება, შემდგომის მიწურულს კი ტური გვექნება.” – განმარტა ადამ ლევინმა.
