Depeche Mode სრულმეტრაჟიან ფილმს აანონსებს, რომელიც Memento Mori-ს ტურნეს ფარგლებში მეხიკოში ჯგუფის გრანდიოზულ 2023 წლის კონცერტებს ასახავს.
ფილმ Depeche Mode: M-ის რეჟისორი მექსიკელი კინორეჟისორი ფერნანდო ფრიასია, რომელიც ცნობილია ფილმებით I’m No Longer Here, Don’t Expect Anyone to Believe Me). Depeche Mode: M -ის გამოსვლა კი წლის ბოლოს იგეგმება.
პრესრელიზის მიხედვით, ეს იქნება ექსპრესიული და დინამიკური კინოფილმი, რომელიც მაყურებელს ბენდის მუსიკალურ მოგზაურობას აზიარებს. ფილმი 200 000 მექსიკელი გულშემატკივრის ბენდთან ემოციურ კავშირებზე მოგვითხრობს.
ფილმში მეხიკოს Foro Sol სტადიონზე ჩატარებული სამი მასშტაბური კონცერტის კადრები იქნება შესული, რომელიც 2023 წლის სექტემბერში გაიმართა.
ამასთანავე, იგი გოთ-როკ ვეტერანი ჯგუფის მე-15 ალბომის, Memento Mori-ს მოტივებსა და მექსიკურ კულტურაში არსებულ, სიკვდილთან და მოკვდავობასთან დაკავშირებულ თემებს იკვლევს.
გლობალურმა ტურნემ Memento Mori Billboard-ის 2024 წლის ყველაზე შემოსავლიანი როკ-ტურნეების ათეულში მეცხრე ადგილი დაიმკვიდრა. ჯგუფმა 63 კონცერტზე 910 000 ბილეთი გაყიდა და თითქმის 125 მილიონი დოლარის შემოსავალი მიიღო.
მიუხედავად წარმატებისა, ვოკალისტმა დეივ გეენმა დეკემბერში განაცხადა, რომ ის და თანადამფუძნებელი გიტარისტი/კლავიშისტი მარტინ გორი ამ ეტაპზე ახალი მუსიკის ჩაწერაზე არ ფიქრობენ.
„მარტინთან ვისაუბრეთ. ცოტა ხნის წინ შევხვდით კიდეც, რაც ძალიან სასიამოვნო იყო. იტალიაში ვიყავით, მშვენიერი დრო გავატარეთ ყოველგვარი სამუშაოს ან საკონცერტო წნეხის გარეშე. მე მართლა ვკითხე მარტინს, რამე ხომ არ დაუწერია, და მან მიპასუხა: არა! ეს ნორმალურია – განსაკუთრებით მაშინ, როცა რამდენიმე წელი ინტენსიურად მუშაობ. ამ ყველაფერს დრო უნდა. დაველოდოთ მოვლენების განვითარებას. არ გამოვრიცხავ, რომ ოდესმე ისევ შევიკრიბოთ, მაგრამ ამ ეტაპზე ეს არ იგეგმება.“ – განაცხადა დეივ გეენმა.
