HYBE სამხრეთკორეული კომპანიაა, რომელიც აერთიანებს მუსიკალურ ფროდაქშენში ლეიბლს, არტისტ მენეჯმენტს, კონცერტების ორგანიზებას, ტექნოლოგიებსა და გართობის ინდუსტრიასთან დაკავშირებულ სხვადასხვა პლატფორმას. HYBE განსაკუთრებით ცნობილი გახდა სუპერვარსკვლავი ბენდის, BTS-ის გლობალური წარმატების შემდეგ.
ამჟამად HYBE განაგრძობს აქტიურ მუშაობას, რათა თავისი არტისტები დაიცვას. ჩრდილოეთ კიონგის პროვინციის პოლიციის სააგენტომ (NGPPA) კომპანიასთან თანამშრომლობით უკვე დააკავა რვა ადამიანი, რომლებიც ეჭვმიტანილნი არიან HYBE Music Group-ის არტისტების ე.წ. Deepfake ვიდეოების შექმნასა და გავრცელებაში. ინფორმაციას ასევე ადასტურებს Billboard. ე.წ. Deepfake არის ყალბი სურათები, ვიდეოები ან აუდიოჩანაწერები, რომლებიც ხელოვნური ინტელექტის გამოყენებით დაგენერირდა.
გამოძიება 2024 წლის თებერვალში HYBE-სა და NGPPA-ს შორის გაფორმებული ურთიერთგაგების მემორანდუმის საფუძველზე დაიწყო. შეთანხმების მიზანი კიბერდანაშაულებთან ბრძოლა და არტისტების უსაფრთხოების დაცვაა. HYBE-მა სააგენტოს სამხილები მიაწოდა, რაც პოლიციას ეჭვმიტანილების იდენტიფიცირებასა და დაკავებაში დაეხმარა. გამოძიებასთან ასევე ითანამშრომლეს არტისტების ერთგულმა გულშემატკივრებმაც, რომლებმაც ინფორმაცია HYBE-ის სპეციალურ ცენტრში გაგზავნეს.
„HYBE-ს მტკიცე და მკაცრი პასუხი ექნება დანაშაულებზე, რომლებიც ჩვენი არტისტების უფლებებსა და რეპუტაციას არღვევენ,” – ნათქვამია HYBE-ის აღმასრულებელი დირექტორის, ჯეისონ ჯესანგ ლის განცხადებაში. „ჩვენ გავაგრძელებთ მონიტორინგს და მივიღებთ სამართლებრივ ზომებს, რათა ამგვარი სერიოზული დანაშაულები მთლიანად აღმოვფხვრათ,” – აღნიშნა მან.
NGPPA-ს წარმომადგენელმა, ჰო-სეონგ კიმმაც დაადასტურა, რომ deepfake-ის შემქმნელ და გამავრცელებელ ეჭვმიტანილებზე ძიება გაგრძელდება. „Deepfake არის სერიოზული დანაშაულის კატეგორია, რომელსაც შეუძლია შეაფერხოს დაზარალებულის ყოველდღიური ცხოვრება,“ – განაცხადა ჰო-სეონგ კიმმა.
ამ ეტაპზე HYBE არ ასახელებს არც ეჭვმიტანილების ვინაობას და არც კონკრეტულ არტისტებს, რომლებიც ამ დანაშაულის სამიზნე აღმოჩნდნენ.
