ლანა დელ რეის ახალი სიმღერა Henry, Come On, რომელსაც მხოლოდ Henry-ის სახელითაც მოიხსენიებენ, როგორც ჩანს, მომღერლის მომავალ მეათე სტუდიურ ალბომში The Right Person Will Stay შევა. გულშემატკივრების მოლოდინი, რომ ეს ალბომი მკვეთრად გამოხატული ქანთრი სტილის იქნებოდა, არ გამართლდა. ეს ვარაუდი კი ლანა დელ რეის სიტყვებს მოჰყვა, რომ ახალი ალბომი 2023 წლის Did You Know There’s a Tunnel Under Ocean Blvd-ის ერთგვარი გაგრძელება იქნებოდა, მკვეთრად გამოხატული ქანთრი სტილით.
საერთო ჯამში, ახალი სინგლი ლანა დელ რეის ტრადიციულ სტილს უფრო ერგება: სენტიმენტალური, რომანტიკული და მელოდიური სიმღერა იმ ხასიათს ატარებს, რომელიც მისი მსმენელისთვის ასე კარგად არის ნაცნობი.
შარშან ნოემბერში ლანა დელ რეიმ 13-ტრეკიანი ალბომის The Right Person Will Stay-ს გამოსვლა დააანონსა, რომელიც მისი თქმით 21 მაისს უნდა გამოვიდეს. ალბომზე მისი მუდმივი კოლაბორატორი ჯეკ ანტონოფი, ასევე ზაქარი დოუზი და ლეირდი მუშაობდნენ.
იანვარში კი ლანამ ქანთრი ჟანრის ალბომი დააანონსა, რომელსაც მაშინ Lasso-ს სახელით მოიხსენიებდა და რომელიც, მისი დაპირებით, 2024 წლის სექტემბერში უნდა გამოსულიყო. „ქანთრის გზას დავადექით!“ თქვა მაშინ ლანა დელ რეიმ. იმავე თვეს არტისტმა სიმღერა Henry, Come On დააანონსა, თუმცა არც სიმღერა და არც ალბომი დაპირებულ დროს არ გამოქვეყნებულა.
ლანა დელ რეი 25 აპრილს Stagecoach Festival-ის სცენაზე წარდგება, სადაც, დიდი ალბათობით, Henry, Come On-საც შეასრულებს.
მოისმინეთ ლანა დელ რეის სიმღერა Henry, Come On.
