Grand National Tour-ში გამგზავრებამდე რამდენიმე დღით ადრე კენდრიკ ლამარმა და SZA-მ ოფიციალური ვიდეოკლიპი გამოსცეს „ბილბორდის” ჩარტის ლიდერ სიმღერაზე Luther. მინიმალისტური ვიდეოს პრემიერა 11 აპრილს შედგა. მისი რეჟისორია კარენა ევანსი, რომელსაც გადაღებული აქვს დრეიკის კლიპები: God’s Plan, Nice for What და In My Feelings. რაც შეეხება Luther-ს, ვიდეოში ვხედავთ ლამარისა და SZA-ს ინტროსპექციულ მომენტებს. კლიპის ბოლოს კი ისმის ლუთერ ვანდროსისა და შერილ ლინის If This World Were Mine-ის ორიგინალი ჩანაწერი, რომელიც სემპლადაა გამოყენებული მთელი სიმღერის განმავლობაში.
Luther უკვე მეშვიდე კვირაა Billboard Hot 100-ის პირველ ადგილს ინარჩუნებს, მიუხედავად იმისა, რომ ჩარტის ლიდერ პოზიციას ლამარის მეტოქე დრეიკი უმიზნებს სინგლით Nokia, რომელიც ამჟამად მესამე ადგილს იკავებს.
ახალი ვიდეოკლიპის გარდა, ფანების განსაკუთრებულ აღტაცებას იწვევს SZA-სა და კენდრიკ ლამარის მომავალი ტურნე, რომელიც ჩრდილოეთ ამერიკასა და ევროპაში ჯამში 39 კონცერტს მოიცავს. ტურნე 19 აპრილს მინეაპილოსში დაიწყება და 9 აგვისტოს სტოკჰოლმში დასრულდება.
ტურნეს გამხსნელ აქტს DJ Mustard შეასრულებს. ეს მეორე შემთხვევა იქნება, როცა Mustard და კენდრიკი სცენაზე ერთად წარდგებიან ლამარის დასამახსოვრებელი Super Bowl Halftime Show-ს შემდეგ, სადაც პროდიუსერის კამეო ვიხილეთ.
ნახეთ Luther-ის ვიდეოკლიპი:
