11 აპრილს Coachella-ს ფესტივალზე ბენსონ ბუნის დებიუტი შედგა. ის მთავარ სცენაზე ბრაიან მეისთან ერთად გამოჩნდა და ენერგიული შესრულებით აუდიტორიის მოწონებაც დაიმსახურა. ბუნმა, რომელიც ფრედი მერკურის ცნობილი სტილის შთაგონებით შეკერილ თეთრ-ლურჯ კოსტიუმში იყო გამოწყობილი, სცენაზე თავისი ქორეოგრაფიული ნომრებით წარდგა.
შოუს დროს ბუნი პიანინოს მიუჯდა და Bohemian Rhapsody შეასრულა, რის შემდეგაც სცენაზე გამოჩნდა ლეგენდარული Queen-ის გიტარისტი ბრაიან მეი. მეიმ ბუნის ბოლო სიმღერაშიც მიიღო მონაწილეობა. გიტარისტმა და მომღერალმა ერთად შეასრულეს Beautiful Things. მეიმ ტრეკს Queen-ისთვის დამახასიათებელი გიტარის პარტიები შემატა. აღსანიშნავია, რომ ეს სიმღერა 2024 წელს Billboard Hot 100-ის ჩარტის მე-2 ადგილს იკავებდა.
„ამ სიმღერამ წელს ჩემი ცხოვრება შეცვალა და იმედი მაქვს, თქვენც მოგეწონებათ,“ – მიმართა ბუნმა მსმენელს. მისი გამოსვლა ფეიერვერკებით და ვიზუალური ეფექტებით იყო გააფორმებული.
ბრაიან მეიმ Coachella-ზე გამოსვლის შესახებ თაყვანისმცემლებს წინასწარ მიანიშნა – მან ინსტაგრამზე ბუნთან ერთად თვითმფრინავში გადაღებული ფოტო გამოაქვეყნა. „ნახეთ, ვის გადავეყარე გზად – პალმ სპრინგსისკენ მივფრინავ,“ – დაწერა მეიმ.
შოუს დროს ბუნმა ასევე გამოაცხადა, რომ მისი მეორე ალბომი American Heart 20 ივნისს გამოვა. მან სცენაზე პირველად შეასრულა დაანონსებული ალბომის მთავარი ტრეკი და წარადგინა ყდაც, სადაც ის ამერიკის დროშის ფონზე დგას.
Coachella-ს გახსნის დღე არაერთი გამორჩეული მომენტით იყო სავსე – სცენაზე გამოჩნდნენ ლედი გაგა, ტაილა, Lisa და სხვა არტისტები. დღის სრული მიმოხილვა იხილეთ Billboard-ზე.
