ლედი გაგა Coachella-ს პირველი დღის ჰედლაინერი იყო. მისი დატვირთული საკონცერტო პროგრამა მოიცავდა სიმღერებს რამდენიმე ალბომიდან, მათ შორის იყო Born This Way, The Fame და მომღერლის ბოლო ნამუშევარი Mayhem. თუმცა ფანებმა მალევე შენიშნეს, რომ გაგას საფესტივალო რეპერტუარში ზოგიერთი ალბომი საერთოდ ვერ მოხვდა.
ერთ-ერთმა გულშემატკივარმა ტიკტოკზე ფესტივალზე გადაღებული ფოტო დადო, სადაც გაგა ჩონჩხებს შორის წევს და ქვიშაში იმარხება. აღნიშნული ჩონჩხები კი დასათაურებულია სწორედ იმ ალბომების სახელებით, რომლებიც მომღერლის პროგრამაში არ შევიდა: 2013 წლის Artpop, 2016 წლის Joanne, 2020 წლის Chromatica და 2024 წლის Harlequin. „გაგამ Artpop დაივიწყა და არ მგონია, რომ Harlequin ახსოვდეს,” – წერს პოსტის ავტორი, რითაც ფილმ Joker: Folie à Deux-სადმი მიძღვნილ ალბომს 2016 წლის Artpop-ს ადარებს, რომელიც პოპენთუზიასტებში „დავიწყებულ ალბომად” არის მიჩნეული.
თუმცა, როგორც ჩანს, გაგას სულაც არ სურს, რომ Harlequin-მა იგივე რეპუტაცია გაიზიაროს, რაც Artpop-ს აქვს და პოსტის ავტორს კომენტარებში გამოეხმაურა: „Harlequin ჩემი ერთ-ერთი ყველაზე საამაყო ნამუშევარია,” – დაწერა მომღერალმა.
Harlequin 2024 წლის სექტემბერში გამოვიდა, როგორც კომპანიონი ალბომი ფილმისა Joker: Folie à Deux, რომელშიც თავად გაგა ჰარლი ქუინის როლს ასრულებს. ჩანაწერმა პირველი ადგილი დაიკავა „ბილბორდის” ჯაზის ალბომებისა და ტრადიციული ჯაზის ალბომების ჩარტებში.
ლედი გაგა Coachella-ს სცენას მომდევნო პარასკევს დაუბრუნდება.
