თორნიკეს მუსიკალური გზა 7 წლის ასაკში დაიწყო, როდესაც ფოლკლორული ანსამბლის, „გეორგიკას“ წევრი გახდა. მოზარდობისას უკვე თავად ქმნიდა მუსიკას და რამდენიმე ინსტრუმენტზე უკრავდა.
17 წლის ასაკში ხმის ინჟინერიით დაინტერესდა და გახდა ხმის რეჟისორ გიორგი გვარჯალაძის (გვაჯის) პირველი მოსწავლე. მალევე გვაჯისთან ერთად მან კინოსტუდია „ქართული ფილმის“ ხმის ჩამწერ სტუდიაში დაიწყო მუშაობა. თავდაპირველად ასისტენტის პოზიციაზე მუშაობდა, თუმცა ერთი წლის შემდეგ სტუდიის მთავარ ხმის ინჟინრად დაინიშნა. აქ მან ექვსი წლის განმავლობაში როგორც თანამედროვე პოპ-მუსიკის, ასევე მრავალი ორკესტრალური და ფოლკლორული მუსიკის ჩანაწერი შექმნა (საქართველოს სახელმწიფო ორკესტრი, ჯანსუღ კახიძის სახელობის ორკესტრი, Georgian Brass…). ორკესტრალურ და ფოლკლორულ ჩანაწერებზე თორნიკე საორკესტრო პროდიუსერ მიშა კილოსანიძესთან ერთად მუშაობდა, რასაც ის დიდ გამოცდილებად მიიჩნევს.
“ძალიან დიდი გამოცდილება იყო მიშასთან მუშაობა, იმიტომ, რომ მისი პროფესიონალიზმის დამსახურებით, ძალიან ბევრი რამ ვისწავლე მუსიკასთან და აუდიო ინჟინერიასთან დაკავშირებით.” – ამბობს თორნიკე.
თორნიკეს პროფესიული კარიერა მრავალ მნიშვნელოვან მუსიკალურ პროექტს და ცნობილ სცენას მოიცავს, მათ შორისაა: Black Sea Jazz Festival, Tbilisi Jazz Festival, Tbilisi Open Air, Montreux Jazz Festival, Fusion Festival, თბილისის ფილარმონია, საქართველოს ეროვნული ოპერისა და ბალეტის თეატრი და სხვადასხვა მუსიკალური სატელევიზიო შოუები.
დღეს თორნიკე ბევრ წამყვან მუსიკალურ პროექტთან, საკონცერტო სივრცესთან და მუსიკალურ ფესტივალთან თანამშრომლობს ხმის ინჟინრის და მუსიკალური პროდიუსერის როლში.
“ცოტა ხნის წინ დავამთავრეთ მუშაობა Creams-ის ახალ ალბომზე, რომელიც სექტემბერში გამოვა. იქ აუდიო ინჟინრის და თანაპროდიუსერის როლი მეკუთვნის. ახლა კი ბექა გოჩიაშვილის ალბომზე ვმუშაობ – ამჯერად უკვე პროდიუსერისა და ინჟინრის ამპლუაში ვარ წარმოდგენილი. ძალიან საინტერესო ალბომი გამოდის,“ – გვიყვება თორნიკე.
ამაყობს რომ ბენდ Bedford Falls-ის ბოლო ალბომის Miende და ალბომის შემდეგ გამოშვებული მათი რამდენიმე სინგლის პროდიუსერი და აუდიო ინჟინერია. ასევე აქტიურად თანამშრომლობს არტისტებთან: Creams, Young Georgian Lolitaz, Circus Mircus, Eko & Vinda Folio, ნიკოლოზ რაჭველი, ლიზა ბათიაშვილი, ბექა გოჩიაშვილი, Blaque Dynamite (Mike Mitchell) და სხვები.
„თავს ძალიან იღბლიანად ვთვლი, რომ მიმუშავია ერთ-ერთ ჩემს ყველა დროის უსაყვარლეს არტისტთან – Blaque Dynamite (Mike Mitchell). ის ბექა გოჩიაშვილის დრამერიც არის და სწორედ ბექას წყალობით გავიცანი. მაიკი არაერთხელ ჩამიწერია სტუდიაში. მისი ბოლო ალბომიდან ორი კომპოზიცია და კიდევ ერთი სინგლი ჩემი ჩაწერილია, რაც ძალიან მეამაყება. ლაივებზეც ბევრჯერ გვიმუშავია ერთად. მასთან მუშაობა ჩემთვის ყოველთვის დიდი სიხარულია,“ – ამბობს თორნიკე.
ქართულ მუსიკალურ სცენაზე საუბრისას, თორნიკე აღნიშნავს, რომ ქვეყანაში მრავალი უნიკალური და ჯერ კიდევ ბოლომდე გამოუმჟღავნებელი ნიჭის მქონე არტისტია:
„ქართული მუსიკის მომავალს დიდი იმედებით ვუყურებ. მჯერა, რომ საქართველოში ბევრი ნიჭიერი არტისტია, რომელთაც ჯერ კიდევ არ ჰქონიათ შესაძლებლობა თავიანთი უნიკალურობის სრულად წარმოსაჩენად,“ – ამბობს თორნიკე გველესიანი, მუსიკალური პროდიუსერი და აუდიო ინჟინერი „ბილბორდ საქართველოსთან“ საუბარში.
