Snoop Dogg საეკლესიო ფესვებს უბრუნდება ახალი ალბომით – Altar Call, რომელიც 27 აპრილს გამოვა. პროექტი მუსიკოსის გარდაცვლილ დედას ეძღვნება.
„27 აპრილს გოსპელ ალბომს გამოვცემ. მისი სახელწოდებაა Altar Call,” – ამბობს რეპერი ინსტაგრამზე გამოქვეყნებულ ვიდეოში. „პირველმა თქვენ გაიგეთ – გოსპელის ალბომი, 27 აპრილს.”
პროექტში, რომელიც 21 კომპოზიციისგან შედგება, მონაწილეობენ ჯეიმი ფოქსი, რობერტ გლასპერი, ჩარლი ბერელი, ჯაინ ჰენდკოკი და სხვები.
ალბომის ყდაზე Snoop Dogg-ის გარდაცვლილი დედაა გამოსახული. ბევერლი ტაიტი 2021 წელს გარდაიცვალა. „შენ მასწავლე წერა და კითხვა, მასწავლე ბრძოლა და ცხოვრების ყველა მოცემულობა,” – თქვა რეპერმა დედის გარდაცვალებისას. „ახლა კი საბოლოოდ გაქვს ფრთები, დედა.”
Okayplayer-თან ინტერვიუში კი მუსიკოსმა ისაუბრა დედის გავლენასა და იმაზე, რომ Altar Call სწორედ მისი სულის გამოძახილია.
„დედაჩემის სული სამუდამოდ იცოცხლებს ჩემში. ეს ალბომი ანარეკლია იმისა, რაც მან მასწავლა: გამოვიყენო ჩემი ხმა და პლატფორმა სიყვარულის გასავრცელებლად და სამყაროს განსაკურნად. ესეც ერთი მომდევნო რიგითი თავი Bible of Love-დან.”
Snoop-ის პირველი გოსპელ ალბომი Bible of Love 2018 წელს გამოვიდა. მასში მონაწილეობენ ფეით ევანსი, ჩარლი უილსონი და სხვები.
2024 წელს დასავლეთ სანაპიროს ლეგენდამ მის ხანგრძლივ მუსიკალურ პარტნიორთან, Dr.Dre-სთან ერთად ალბომი Missionary გამოსცა, რომელიც Billboard 200-ის მეოცე ადგილზე გავიდა.
ნახეთ Snoop Dogg-ის ვიდეო:
