ელექტრონული მუსიკის ფესტივალი 4GB 2025 წელს განახლებული ფორმატით გაიმართება. ფესტივალი ერთდღიანი იქნება და 16 მაისს, რადიო ქალაქის სივრცეში ჩატარდება. მსმენელის წინაშე ელექტრონული მუსიკალური სცენის ცნობილი არტისტი მაიკლ მაიერი წარდგება.
4GB ყოველწლიური ელექტრონული მუსიკის ფესტივალია, რომელიც პიონერი ქართველი დიჯეის – გიო ბაქანიძის ხსოვნას ეძღვნება. წლების განმავლობაში ფესტივალი რეგიონში ერთ-ერთ მნიშვნელოვან მუსიკალურ მოვლენად იქცა. პანდემიისა და უკრაინაში მიმდინარე ომის გამო გამოცხადებული სამწლიანი პაუზის შემდეგ 4GB 2023 წელს დაბრუნდა, თუმცა 2024 წელს ქვეყანაში
მიმდინარე საპროტესტო ტალღის გამო კვლავ გაუქმდა. აღსანიშნავია, რომ წლევანდელ ფესტივალზე დასწრებას შეძლებენ მსმენელები, რომლებიც შარშან ნაყიდ ბილეთებს წარადგენენ. ამასთანავე, ადამიანებმა, რომლებმაც 4GB-ის ფესტივალის ბილეთები შარშან შეიძინეს, არ დააბრუნეს და შეინახეს, შესაძლებლობა ექნებათ, როგორც წლევანდელ, ასევე მომავალ ფესტივალს განსაკუთრებული სტუმრის სტატუსით დაესწრონ.
„4GB ადასტურებს, თუ როგორ შეუძლია საერთო ღირებულებებსა და ერთიან ნებაზე დაფუძნებულ თანამოაზრეებს, ხსოვნისადმი მიძღვნილი ღონისძიება რეგიონული მნიშვნელობის ფესტივალად გადააქციონ – ისე, რომ საწყის ემოციებთან და ფასეულობებთან კავშირი არ დაიკარგონ. პირველი წლებიდანვე ფესტივალის ჰედლაინერი გიოს საყვარელი არტისტი – მაიკლ მაიერი იყო. 2011 წელს ის იყო ერთადერთი მოწვეული არტისტი და 1000 კაცისთვის დაუკრა. მას შემდეგ კი ყოველწლიურად სწორედ ის ხურავს ფესტივალს,” – ვკითხულობთ 4GB-ის ვებ-გვერდზე.
2025 წლის 4GB-ის შესახებ მეტი დეტალისათვის ეწვიეთ ბმულს.
