16 აპრილს გავრცელდა ინფორმაცია, რომ რეჟისორი დავით დოიაშვილი ვასო აბაშიძის სახელობის სახელმწიფო პროფესიული ახალი თეატრის ხელმძღვანელის პოზიციიდან გათავისუფლდა. კულტურის სამინისტროს განცხადებას „იმედი” ავრცელებს. სამინისტრო გადაწყვეტილების საფუძვლად ვალდებულებების შეუსრულებლობას ასახელებს.
ვასო აბაშიძის სახელობის სახელმწიფო პროფესიული ახალი თეატრის დასის საპროტესტო მოძრაობა დაიწყო მას შემდეგ, რაც პროკურატურამ ახალი თეატრის მსახიობს, ანდრო ჭიჭინაძეს ბრალი წაუყენა ჯგუფური ძალადობის მუხლით, რის გამოც მას მრავალწლიანი პატიმრობა ემუქრება. იანვარში დავით დოიაშვილმა თეატრის წინ გამართულ მანიფესტზე მსახიობებთან ერთად საზოგადოებას პროტესტის მიზეზები გააცნო და მოძრაობის ფარგლებში რეგიონებში გასვლაც დააანონსა.
