ქართულ მუსიკალურ სივრცეში ახალი როკბენდი – KAIAKUMAS გაჩნდა. ჯგუფის წევრები არიან ნანკა გვარიშვილი, გოგა სანოძე, ოთო სანოძე, სანდრო ხატიაშვილი და ლადო გიგაია. ცოტა ხნის წინ ბენდმა სადებიუტო ტრეკი და მასზე გადაღებული მუსიკალური ვიდეოკლიპი წარადგინა.
KAIAKUMAS-ის შესახებ Billboard Georgia ბენდის ვოკალისტს, ნანკა გვარიშვილს ესაუბრა:
„მე და მუსიკალური პროდიუსერი გოგა სანოძე ერთმანეთს მერაბ სანოძემ (სანომ) გაგვაცნო. თავიდანვე დავმეგობრდით. შესაძლოა, იმდენად საერთო მუსიკალური ენა აღმოგვაჩნდა, რომ სწორედ ამან დაგვაახლოვა. სანოს სტუდიაში გატარებული დღეების შემდეგ მივხვდით, რომ ბენდი ორივეს ოცნება იყო და ეს შესაძლებლობა ოცნების ასახდენად უნდა გამოგვეყენებინა. ჩვენი ბენდის დრამერი ოთო სანოძეა, მერაბ სანოძის შვილი. ბასისტი – ლადო გიგაია, გიტარისტი კი სანდრო ხატიაშვილი, რომელიც ასევე არის ჩემი პოდკასტის ოპერატორი, მონტაჟის რეჟისორი და ჩვენი პირველი მუსიკალური ვიდეოც სწორედ მისი გადაღებულია.”
როგორც ნანკა გვარიშვილი ამბობს, ბენდის მუსიკალური კონცეფცია მისი საყვარელი ჟანრები – პოსტ-პანკი და ინდიროკია. ჯგუფის წევრებს სურთ, KAIAKUMAS-ის მუსიკა იყოს ნოსტალგიური და შთამაგონებელი – თითოეული ახალი დღის მუხტი და ახალი შესაძლებლობების მოტივაცია, ასევე საინტერესო სიახლე ქართულ მუსიკალურ სივრცეში.
KAIAKUMAS-ის მუსიკას გოგა სანოძე წერს, ხოლო ტექსტებს – ნანკა გვარიშვილი.
„ხშირად გოგა მახვედრებს მუსიკას და შემდეგ ამაზე ვწერ ტექსტს. ეს ტექსტები ჩემთვის დღიურივითაა – ძალიან გულახდილი, ბავშვური, მეამიტი და ემოციური. იმედი მაქვს, მათი მოსმენისას ბევრი საკუთარ თავს იპოვის. ასეთია ჩვენი პირველი სიმღერაც – „სევდიანი ფიქრები”. ყველას გვქონია მელანქოლიური და ცოტა დეპრესიული პერიოდი, სწორედ ამ ემოციას ეძღვნება ეს სიმღერა და მინდა, ის ზუსტად ამ მდგომარეობიდან გამოსვლის ინსპირაციად იქცეს,” – ამბობს ნანკა გვარიშვილი.
ნანკა გვარიშვილს, როგორც სოლო შემსრულებელს, მსმენელი უკვე იცნობს, თუმცა ამბობს, რომ სწორედ ბენდმა გააცნობიერებინა, რასთან სურს საკუთარი მუსიკალური შემოქმედების დაკავშირება.
ნანკა გვარიშვილი:
„ბენდის წევრების სახით აღმოვაჩინე ადამიანები და მუხტი, რაზეც ამდენი ხანი ვოცნებობდი. რაც მთავარია, გოგა სანოძესთან ერთად ვიპოვე მუსიკალური მიმართულება, რომლის შესრულებაც მაბედნიერებს. ამიტომ, მსმენელს წინ ბევრი სიახლე ელის. უკვე მზად გვაქვს რამდენიმე სიმღერა, რომლებსაც ეტაპობრივად გაგიზიარებთ.“
