Bluebird-ის გამოსვლით ლანა დელ რეის ფანებმა, შეიძლება ითქვას, რომ მისი კარიერის ახალი ეტაპის გემო გაიგეს. Henry, Come On-ის გამოცემიდან ერთი კვირის შემდეგ რეიმ მსმენელს აჩვენა, თუ რას უნდა ელოდონ მისი ახალი, როგორც თავად უწოდებს, ქანთრი ალბომიდან.
წინამორბედების მსგავსად, Bluebird მუსიკოსის კიდევ ერთი ემოციური ინტროსპექციაა. მასთან ერთად პროექტზე ქანთრის საოცნებო გუნდად მიჩნეულმა ლუკ ლერდმა და დრიუ ერიკსონმა იმუშავეს. ეს კი მიანიშნებს იმაზე, რომ დელ რეის მომავალი ალბომი მისი კარიერის კიდევ ერთ მაღალ წერტილს უმიზნებს.
თუმცა ამ ეტაპზე ჯერ კიდევ უცნობია, როდის გამოვა ახალი ჩანაწერი, ან რა იქნება მისი სახელწოდება. თავდაპირველად, 2024 წლის დასაწყისში, ალბომი Lasso-ს სახელით დაანონსდა, გამოცემის თარიღად კი სექტემბერი დასახელდა. ხოლო მოგვიანებით 13-სიმღერიან ჩანაწერს The Right Person Will Stay ეწოდა და მისი გამოშვება 10 მაისისთვის გადაიდო.
Henry, Come On-ის შემდეგ კი რეიმ ფანებს უთხრა, რომ მისი მეათე ალბომი კვლავ იდუმალებითაა მოცული. „იცით, ხომ, რომ თავის დროზე აღარ გამოდის? – თქვა მომღერალმა 11 აპრილს. „ისიც უნდა გითხრათ, რომ მისი სახელი კიდევ ერთხელ შეიცვალა? და ეს ყველაფერი ახლა უნდა გითხრათ, როცა ასეთი ბედნიერები ხართ ახალი სიმღერით? კარგი, მგონი, ჯობს, დავიცადო.”
ალბომის გამოცემის გადადება მუსიკოსისთვის ახალი არ არის. მისი ბოლო სამივე პროექტი – Did You Know That There’s a Tunnel Under Ocean Blvd, Chemtrails Over the Country Club და Blue Banisters – დაგვიანებით გამოვიდა.
დელ რეი 25 აპრილს ფესტივალ Stagecoach-ზე წარდგება. ივნისსა და ივლისში დიდ ბრიტანეთში გამართული კონცერტების შემდეგ კი აშშ-ში დაბრუნდება და 3 აგვისტოს Hinterland Music Festival-ზე იმღერებს.
მოუსმინეთ Bluebird-ს:
