მიშელ ტრაქტენბერგის გარდაცვალებიდან თითქმის ორი თვის შემდეგ ნიუ-იორკის მუნიციპალიტეტმა და მთავარმა სამედიცინო კვლევის ოფისმა მსახიობის გარდაცვალების მიზეზი გაამხილეს.
People-ის ინფორმაციით, სამედიცინო კვლევის ოფისში დაადასტურეს, რომ ტრაქტენბერგი ბუნებრივი სიკვდილით გარდაიცვალა, რაც დიაბეტის გართულებებმა გამოიწვია. „დასკვნა ტოქსიკოლოგიური კვლევების შედეგად გაკეთდა, რომელთა ჩატარებაც ავტოფსიის გარეშეა შესაძლებელი,” – აღნიშნა წარმომადგენელმა.
ტრაქტენბერგი 26 თებერვალს, 39 წლის ასაკში გარდაიცვალა. მსახიობი უგონო მდგომარეობაში აღმოაჩინეს.
მიუხედავად იმისა, რომ მისი გარდაცვალება არ ყოფილა მიჩნეული „საეჭვოდ”, ოჯახმა, ებრაული რწმენის გამო, ავტოფსიაზე უარი განაცხადა. შესაბამისად, მოსალოდნელი იყო, რომ მსახიობის გარდაცვალების მიზეზი უცნობი დარჩებოდა. თუმცა ტოქსიკოლოგიური კვლევების შედეგებმა საბოლოოდ მიზეზის დადგენა მოახერხა.
ტრაქტენბერგმა მსახიობობა ბავშვობიდან დაიწყო და 10 წლის ასაკში ცნობილი გახდა ფილმით Harriet the Spy. 2000-2003 წლებში თამაშობდა სერიალში Buffy the Vampire Slayer. მონაწილეობს ფილმში „ევროტური” და სერიალში Gossip Girl.
ტრაქტენბერგი გამოჩნდა ისეთი არტისტების ვიდეოკლიპებშიც, როგორებიც არიან Trapt და Ringside, ასევე Fall Out Boy-ს სიმღერაში This Ain’t a Scene, It’s an Arms Race, რომელმაც Billboard Hot 100-ის მეორე პოზიცია დაიკავა.
