კენდრიკ ლამარი Chanel-ის ბრენდ ამბასადორი გახდა. არტისტი გამოჩნდება ფრანგული მოდის სახლის ახალი სათვალეების სარეკლამო კამპანიაში, რომელიც 22 აპრილს გამოდის. ინფორმაცია ექსკლუზიურად Business of Fashion-მა გაავრცელა.
„Chanel-ის ატელიეში ვიმყოფებოდი და საკუთარი თვალით ვნახე, როგორ ტრანსფორმირდება იდეა დიზაინიდან რეალურ პროდუქტამდე. ვუყურებდი ადამიანებს, რომლებიც დაუღალავად შრომობენ და იდეებს აცოცხლებენ და თავი ჩემთვის ნაცნობ გარემოში ვიგრძენი,“ – აღნიშნა რეპერმა გამოცემასთან ინტერვიუში.
„Chanel-ს აქვს მემკვიდრეობა, რომელიც დროს უძლებს. ბრენდი მამაკაცებისთვის ტანსაცმელს არ ქმნის, ამიტომ თავიდანვე სათვალეების იდეა მქონდა,“ – აღნიშნა კენდრიკ ლამარმა. არტისტი სწორედ Chanel-ის სათვალეებს ატარებს Luther-ის ვიდეოკლიპში, რომელიც მისი და SZA-ს ერთობლივი ნამუშევარია. სიმღერა Billboard Hot 100-ის პირველ ადგილს 26 აპრილით დათარიღებულ ჩარტში უკვე მეცხრედ იკავებს.
ლამარი Chanel-ის ახალი სათვალეების კამპანიაში ბრენდის სხვა ცნობილ ამბასადორებთან ერთად გამოჩნდება. კამპანიის ფოტოებიც ცნობილმა ფოტოგრაფმა, კარიმ სადლიმ გადაიღო.
ლამარს Chanel-თან წარსულშიც უთანამშრომლია – 2023 წლის Met Gala-ზე, რომელიც თემატურად ლეგენდარული დიზაინერისა და Chanel-ის ყოფილი კრეატიული დირექტორის, კარლ ლაგერფელდის ცხოვრებას მიეძღვნა, კენდრიკი სპეციალურად მისთვის შექმნილი ტყავის მოსაცმელით წარდგა.
კენდრიკ ლამარმა და მისმა კრეატიულმა პარტნიორმა, დეივ ფრიმ მოგვიანებით Chanel-ის 2024 წლის მაღალი მოდის შოუს სცენოგრაფია შექმნეს. ამავდროულად, გადაიღეს მოკლემეტრაჟიანი ფილმიც – The Button, რომელშიც ნაომი კემპბელი და მარგარეტ ქუალი მონაწილეობენ.
ლამარი ამჟამად საკონცერტო ტურნეს მართავს SZA-სთან ერთად. Grand National Tour-ის ფარგლებში პირველი შოუ შაბათ საღამოს მინეაპოლისის U.S. Bank Stadium-ზე გაიმართა.
