ლანა დელ რეის უახლესი სიმღერა Bluebird პარასკევს, 18 აპრილს გამოვიდა, თუმცა, როგორც აღმოჩნდა, ის მრავალი წლის წინ დაიბადა. მომღერლის თქმით, ბალადა თავში მაშინ მოუვიდა, როცა ხელში პატარა, შეშინებული ჩიტი დაიჭირა, რომელიც მის ფანჯარას შეეჯახა. ამის შესახებ დელ რეიმ გავრცელებულ ვიდეოში ისაუბრა.
„მისამღერი, თავისი მელოდიითა და ტექსტით, პირველად ძალიან დიდი ხნის წინ წავიმღერე ჩემთვის. მაშინ ერთ ადამიანს ვხვდებოდი, რომელიც დიდი ხანი არ მყავდა ნანახი. მან კი დამირეკა და მკითხა, თუ მსურდა მასთან ერთად სასეირნოდ წასვლა. გამიხარდა, მაგრამ არ ვფიქრობდი, რომ ეს კარგი იდეა იყო.”
მომღერლის თქმით, შეხვედრას მაინც დათანხმდა. ამის შემდეგ კი მოხდა ის, რამაც გააოცა.
„მოულოდნელად ჩემი საძინებლის ფანჯარას პატარა ჩიტი შეეჯახა. შოკში ვიყავი. კარი გავაღე და დავინახე, მგონი, ბეღურა იყო ან მერცხალი. ეს ძალიან ემოციური იყო, რადგან არის მომენტები, როცა ხვდები, რომ რაღაც შენთვის ხდება. ხანდახან მგონია, რომ ბუნებას შენთან კომუნიკაციის საკუთარი გზა აქვს, განსაკუთრებით, რთულ სიტუაციებში. ეს ის გზაა, რომელსაც მხოლოდ შენ გაიგებ.”
„მინდოდა, ხელში ამეყვანა. იმედი მქონდა, რომ კარგად იქნებოდა. ჩავიმუხლე და სიმღერა დავიწყე: Little bird, little bird, fly away for both of us და უბრალოდ ცრემლები მომდიოდა ჩემი და ჩიტის გამო.”
როგორც ისტორიიდან ირკვევა, პატარა ჩიტი საბოლოოდ გაფრინდა, თუმცა ლანა მის კვალს არ გაჰყვა და საბოლოოდ სასეირნოდ მაინც წავიდა.
„ეს არ ყოფილა პირველი შემთხვევა, როცა ჩიტის გამოჩენა ჩემთვის ერთგვარი მესიჯი იყო,” – ამბობს მომღერალი.
Bluebird მეორე სიმღერაა, რომელიც დელ რეიმ მომავალი ალბომიდან გამოაქვეყნა. პირველი სინგლი Henry, Come On იყო. ალბომი თავდაპირველად Lasso-ს, შემდეგ კი The Right One Will Stay-ს სახელით უნდა გამოსულიყო, თუმცა ამჟამად ჩანაწერი უსათაუროა და მისი გამოშვების თარიღიც უცნობია.
ნახეთ ლანა დელ რეის ვიდეო Bluebird-ის შესახებ:
