კვირას ლაიამ გალაგერმა X-ზე პოსტი გამოაქვეყნა, სადაც იგი აღნიშნავს რომ აღდგომას ძმასთან, ნოელ გალაგერთან და მის ორ შვილთან, დონოვანთან და სონისთან ერთად შეხვდა:
„ბიბლიური აღდგომა გვქონდა, ნოელი, დონოვანი და სონი სახლში ჩაიზე გვესტუმრნენ, საოცარი გრძნობა იყო ამ ლამაზი ახალგაზრდების გაცნობა.” – წერს არტისტი.
ეს შეხვედრა სულ რამდენიმე თვით უსწრებს Oasis-ის პირველ გაერთიანებულ კონცერტებს. ბენდის ხმაურიანი დაშლის შემდეგ ლეგენდარული ბრიტპოპ ჯგუფი მსოფლიო ტურს ივლისში დაიწყებს. ცნობისთვის, ამ დროისთვის უკვე 41 კონცერტია დაანონსებული.
ტურის პირველი ორი კონცერტი Principality-ის სტადიონზე, უელსში 4-5 ივლისს გაიმართება, ტური ბრიტანეთში 24 აგვისტომდე გაგრძელდება, შემდეგ კი ბენდი ამერიკაში, მექსიკაში, სამხრეთ კორეაში, იაპონიასა და ავსტრალიაში აპირებს ტურნეს გაგრძელებას.
ახალი ერთობლივი ტური ათწლეულის განმავლობაში ძმებს შორის არსებული დაძაბულობის შემდეგ გაიმართება. Oasis-ს ბოლო ტური 2009 წელს ჰქონდა, ამავე წელს პარიზში მათ შორის დაძაბულობამ პიკს მიაღწია და ძმები ერთმანეთს ფიზიკურად დაუპირისპირდნენ. კონფლიქტმა საბოლოოდ ბენდი დაშლამდე მიიყვანა, რის შემდეგაც ორივე ძმის მუსიკალური გზა გაიყო: ლაიამ გალაგერმა სოლო კარიერა დაიწყო და რამდენიმე ალბომიც გამოსცა, ხოლო ნოელმა ჯგუფი High Flying Birds შექმნა.
გასულ თვეს ბენდმა განაცხადა, რომ Oasis Live ’25 ტურნეზე დოკუმენტური ფილმის გადაღება იგეგმება, რომელიც BAFTA-სა და ოსკარზე ნომინირებული სცენარისტისა და პროდიუსერის, სტივენ ნაიტის ხელმძღვანელობით შეიქმნება, ფილმის რეჟისორები კი დილან სოუთერნი და უილიამ ლოვლესი იქნებიან.
