ელექტრონული მუსიკის გამორჩეული ფესტივალი – eZo Festival 2014 წელს დაარსდა და თბილისში, მთაწმინდის პარკის ტერიტორიაზე რამდენიმეწლიან დაუვიწყარ ისტორიას ითვლის. ამ ხნის განმავლობაში ის მსმენელისთვის ერთ-ერთი ყველაზე საყვარელი, ფერადი და საინტერესო ადგილი იყო, რომელსაც Mzesumzira Community უწევდა ორგნიზებას.
წელს ფესტივალს 10 წელი უსრულდება და ორგანიზატორები ამ თარიღის აღსანიშნად განსაკუთრებით ემზადებოდნენ, თუმცა როგორც მათ მიერ გავრცელებულ განცხადებაშია ნათქვამი, თბილისის მიწათსარგებლობის გენ. გეგმის მიხედვით, ფესტივალის ტერიტორია სატყეო ზონაში მოექცა, იჯარის ხელშეკრულება აღარ გაგრძელდა და მის ჩატარებაზე ორგანიზატორებს უარი უთხრეს.
Biilboard Georgia უცვლელად გთავაზობთ eZo Festival-ის სოციალურ ქსელში გავრცელებულ განცხადებას.
“მეგობრებო, მნიშვნელოვანი ამბავი გვაქვს თქვენთვის სათქმელი:
წელს ეზო ფესტივალი 10 წლის ხდება.
ბუნებრივია, ვგეგმავდით, რომ სახლში, ჩვენსავე ეზოში აღგვენიშნა ასეთი მნიშვნელოვანი იუბილე, მაგრამ თბილისის მიწათსარგებლობის გენ. გეგმის მიხედვით, ჩვენი ფესტივალის ტერიტორია სატყეო ზონაში მოექცა, შესაბამისად, იჯარის ხელშეკრულება აღარ გაგვიგრძელდა და ეზო ფესტივალის ჩატარებაზეც უარი გვითხრეს.
რაც შეგვეძელო და არ შეგვეძლო, ყველაფერი გავაკეთეთ, რომ დაბადების დღეზე, სახლში მოგვეპატიჟებინეთ, მაგრამ არ გამოვიდა. დაუჯერებელია, მაგრამ ამ წერილს უკვე სივრცის დემონტაჟის ფონზე ვწერთ.
ეს პროცესი ემოციურად ისეთი რთული აღმოჩნდა, ცრემლების შეკავება აზრადაც არ მოგვსვლია.
ვიხსენებთ ყველას, ვინც ეს ფესტივალი აქამდე მოიყვანა – კომუნის ყველა წევრს, მეგობრებს, ეზოს გულშემატკივრებს, სტუმრებსა და არტისტებს.
გახსენებაც კი რთულია ემოციურად; ამ 10 წლიან გზაზე რამდენი მეგობარი შევიძინეთ, რამდენ არტისტს ვუმასპინძლეთ, რამდენ დაუვიწყარ მთვარის ჩასვლასა და მზის ამოსვლას ვუყურეთ ერთად…
თუმცა ერთ კარგ ამბავსაც გეტყვით, – მიუხედავად ემოციური, ფინანსური თუ მენტალური გამოწვევებისა, თავს უფლება ვერ მივეცით, კიდევ ერთხელ არ შევხვედროდით ერთმანეთს. სწორედ ამიტომ, ჩვენ მაინც გიმზადებთ ბოლო, გამოსამშვიდობებელ ფესტივალს: Last Dance of Ezo Festival – დაგემშვიდობებით ჩვენთვის სიმბოლურ ადგილას, იქ, სადაც პირველი ნაბიჯები გადავდგით და სადაც ვიცით, რომ შევძლებთ, შევქმნათ ის განწყობა, რომელიც ეზოზე გვხვდებოდა და გვძირავდა თავგადასავლების დიდ მორევში.
ამ რთული პერიოდის გადალახვაში, თქვენი მხარდაჭერა წარმოუდგენლლად მნიშვნელოვანია. სწორედ ეს ერთობა გვაძლევს ძალას, ვიდგეთ ფეხზე და დაბრკოლებების მიუხედავად, მაინც წინ ვიყუროთ. ყოველთვის დავრჩებით მადლიერები თქვენთან ერთად გატარებული დაუვიწყარი დღეების.
აქვე ისიც უნდა ვთქვათ, რომ ამ პროცესმა ძალიან დიდ ფინანსურ პრობლემებს დაუდო სათავე. მომავალში გადასაჭრელმა ყველა საკითხმა ახლა, ამ მომენტში მოიყარა თავი. შესაბამისად, ბოლო საფესტივალო დღეები და თქვენი მხარდაჭერა ამ მხრივაცაა მნიშვნელოვანი.
მართალია, ეს ბოლო eZo ფესტივალი იქნება, მაგრამ ზაფხულის განმავლობაში კვლავ შევხვდებით eZo Club Night-ის ფორმატით რამდენიმე გამორჩეულ საკლუბო სივრცეში.
გვჯერა, ბოლო საფესტივალი დღეებით eZo-ს ცხოვრების მხოლოდ ერთი თავი სრულდება. ჯერ არ ვიცით ზუსტი გეგმა, არც ახალი ინსპირაციები მიგვიღია, თუმცა გვწამს, რომ eZo აუცილებლად იპოვის ახალ სიცოცხლეს.
თქვენ კი გამოგვყევით ამ გზაზე, ჯერაც ბევრი რამ გვაქვს გასახსენებელი და მოსაყოლი.
სიყვარულით,
eZo.
P.S. იმ ერთგულ სტუმრებსა და მეგობრებს კი, რომლებმაც ახალი წლის გაუქმებული ღამის ბილეთი არ დააბრუნეთ, გეტყვით, რომ მაგ სიკეთეს არ გივიწყებთ; მეილებს უდარაჯეთ – თქვენ ახალი ბილეთი გამოგეგზავნებათ.”
