პირველ მაისს Green Day-ს ჰოლივუდის დიდების ხეივანში ვარსკვლავს გაუხსნიან. მოწვეულ სტუმრებს შორის არიან ჩოგბურთის ლეგენდა სერენა უილიამსი და მსახიობი რაიან რეინოლდსი. ცერემონიას რადიოს და ტელევიზიის ვარსკვლავი მეტ პინფილდი გაუძღვება.
ვეტერანი როკჯგუფის ვარსკვლავი ჰოლივუდ ბულვარზე განთავსდება. ის ახლოს არის Amoeba Music-ის მაღაზიასთან, რასაც სიმბოლური დატვირთვა აქვს. ღონისძიებას პირდაპირ ეთერში გადასცემს დიდების ხეივნის ვებ-გვერდი. ეს იქნება 2 810-ე ვარსკვლავის გახსნის ცერემონია მას შემდეგ, რაც ტურისტულ ღირსშესანიშნაობად ქცეული ადგილი 1960 წელს გაიხსნა.
Green Day 2015 წელს როკ-ენ-როლის დიდების დარბაზში შეიყვანეს. ჯგუფს ხუთი გრემი აქვს მიღებული. მათ შორის ერთ-ერთი ჯილდო მუსიკალურმა კოლექტივმა 2006 წელს წლის ჩანაწერის ნომინაციაში, Boulevard of Broken Dreams-ისთვის მოიპოვა.
„ჰოლივუდის სავაჭრო პალატისთვის პატივია, მიესალმოს Green Day-ის წევრებს – ბილი ჯო არმსტრონგს, მაიკ დირნტს და ტრე კულს დიდების ხეივანში,” – ნათქვამია ცერემონიის პროდიუსერის, ანა მარტინესის განცხადებაში. „Green Day-ს მუსიკა არა მხოლოდ თაობებს შთააგონებს, არამედ ჩვენი ცხოვრების საუნდტრეკადაც იქცა.”
დიდების ხეივანს ადმინისტრირებას ლოს-ანჯელესის სახელით სწორედ ჰოლივუდის სავაჭრო პალატა უწევს. ის უკვე ათწლეულებია ვარსკვლავის გახსნის ცერემონიებს მასპინძლობს.
Green Day 1986 წელს ბერკლიში, კალიფორნიაში ჩამოყალიბდა და მას შემდეგ Billboard 200-ის ჩარტის ტოპ ათეულში 12-ჯერ მოხვდა . ბენდი ალბომების ჩარტში სამჯერ იკავებდა პირველ ადგილს ნამუშევრებისთვის – American Idiot (2004), 21st Century Breakdown (2009) და Revolution Radio (2016). Billboard Hot 100-ის ჩარტის ტოპ ათეულში კი სხვადასხვა დროს მოხვდა ჯგუფის ორი ჰიტი – Boulevard of Broken Dreams და Wake Me Up When September Ends.
წელს ჯგუფი Coachella-ს ჰედლაინერი იყო და ორ საფესტივალო საღამოზე 200 000-ზე მეტი მსმენელის წინაშე წარდგა.
