ჰიპ-ჰოპ პროდიუსერის, შონ კომბსის, იგივე Diddy-ს ირგვლივ განვითარებული სკანდალი BBC-ის საგამოძიებო დოკუმენტურ ფილმში იქნება ასახული. P Diddy: The Rise and Fall („P Diddy: აღზევება და დაცემა”) – ასე ჰქვია ფილმს და ის კომბსის წარმატებისა და დაცემის ქრონიკას იკვლევს. როგორც ფილმის შემქმნელები აღნიშნავენ, „მისი გავლენა ცალსახაა, თუმცა შესაძლოა, მისი მემკვიდრეობა სამუდამოდ შეილახოს.”
დოკუმენტური ფილმი ერთ-ერთია კომბსის შესახებ მომზადებული შოკისმომგვრელი და გახმაურებული მასალებიდან. ფილმი 28 აპრილს BBC Three-სა და iPlayer-ზე გავა და მას არაერთი ჯილდოს მფლობელი ბრიტანელი ჟურნალისტი, ინკა ბოკინი გაუძღვება.
კომბსი თითქმის რვა თვეა, რაც დაკავებულია და ფედერალურ სასამართლო პროცესს ელოდება, რომელიც 5 მაისს დაიწყება. მას წაყენებული აქვს მძიმე ბრალდებები ორგანიზებულ დანაშაულში, სექსუალურ ექსპლუატაციაში, ტრეფიკინგის ქსელის მართვასა და პროსტიტუციისთვის ხელის შეწყობაში. პროკურატურის თქმით, კომბსი ქალებს აშინებდა, ავიწროებდა და აიძულებდა დანაშაულებრივ საქმიანობაში მონაწილეობას, რაც, სავარაუდოდ, მოიცავდა ადამიანების გატაცებას, ქრთამს და იძულებით შრომას. კომბსი ბრალდებებს უარყოფს. მან სასამართლოს პროცესის გადადების შუამდგომლობით მიმართა, თუმცა ეს მოთხოვნა არ დაკმაყოფილდა.
ამჟამად Diddy-ს წინააღმდეგ ათეულობით სარჩელია შეტანილი გაუპატიურებისა და ფიზიკური ძალადობის ბრალდებით. BBC-ის განცხადებით, ფილმი შეისწავლის, როგორ იქცა კომბსი „მსოფლიოს ყველაზე წარმატებული ჰიპ-ჰოპ ანტრეპრენერიდან ადამიანად, რომელმაც ძალიან მოკლე დროში დაკარგა მეგობრებისა და თაყვანისმცემლების მხარდაჭერა.” დოკუმენტური ნამუშევარი აღწერს კომბსის გავლენას მოდის, მუსიკისა და კულტურის სამყაროში. ფილმის ნარატორი და წამყვანი ჟურნალისტი ინკა ბოკინი რეპერთან დაახლოებულ პირებს გაესაუბრება, რათა გაიგოს ისტორიის ქრონოლოგია, მიზეზები და კავშირები მოვლენებს შორის.
„ჩემი საქმე ისტორიების მოყოლაა, მაგრამ ვერასდროს წარმოვიდგენდი, რომ ამ ამბავს მოვყვებოდი. Diddy-ს წინააღმდეგ წაყენებული ბრალდებების გამოძიებამ ნათელი მოჰფინა იმ ბნელ მხარეს, რომელსაც ინდუსტრია მალავს – ინდუსტრია, რომელზეც ბევრ ჩვენგანს უოცნებია. ვმღეროდით მის სიმღერებს, ვუყურებდით შოუებს. მოახლოებული სასამართლო პროცესის ფონზე, ცხადია, ვფიქრობთ, რომ მოვლენები დრამატულად განვითარდება,” – აღნიშნა ინკა ბოკინმა.
BBC-ის დოკუმენტური ფილმი ერთ-ერთია იმ მრავალი პროექტიდან, რომელიც კომბსის დაცემას ეძღვნება. მაყურებელმა უკვე იხილა Max-ის The Fall of Diddy, TMZ-ის The Downfall of Diddy, ასევე Prime Video-ს დოკუმენტური ნამუშევრები – Diddy: Monster’s Fall და Diddy: Summit to Plummet. Diddy-ს შესახებ დოკუმენტური ფილმი დააანონსა Netflix-მაც, რომელიც 50 Cent-ის საპროდუქციო კომპანიის – G-Unit Films-ის წარმოებულია და რომლის გამოსვლის თარიღი ჯერჯერობით უცნობია.
