საქართველოს მუსიკოსთა პროფესიულმა კავშირმა სოციალურ ქსელში განცხადება გაავრცელა, რომელშიც ხაზგასმით აღნიშნულია, რომ საქართველოში მუსიკოსთა უფლებები ირღვევა. განცხადების თანახმად, მუსიკალურ სკოლებში მასწავლებლების ანაზღაურება უკიდურესად დაბალია, ხოლო მათი შრომითი უფლებები – უგულებელყოფილი.
“დამოუკიდებელი საქართველოს ისტორიაში არც ერთ ხელისუფლებას არ გამოუჩენია რეალური ზრუნვა მუსიკის განვითარებაზე. ქვეყანაში ფაქტობრივად არ არსებობს ისეთი კანონმდებლობა, რომელიც მუსიკოსთა კეთილდღეობას უზრუნველყოფდა. მუსიკოსებსა და ანსამბლებს არც რეგისტრაციის შესაძლებლობა აქვთ, რის გამოც ბევრს უწევს ხელფასის ხელზე, არალეგალურად აღება”, — აღნიშნულია განცხადებაში.
პროფესიული კავშირის ინფორმაციით, ამ მძიმე მდგომარეობის ფონზე, აუცილებელია საზოგადოების აქტიური ჩართულობა მუსიკოსთა შრომითი უფლებების დასაცავად.
1 მაისს, 19:00 საათზე აქციის მონაწილეები ორბელიანის მოედანზე “ერთობის მარშს” შეუერთდებიან.
