გლობალურმა მუსიკალურმა ავტორიტეტმა Billboard-მა განაცხადა, რომ მაიკ ვანი კომპანიის პირველი აღმასრულებელი დირექტორის (CEO) პოზიციაზე დაინიშნა. ამ ამპლუაში ვანი Billboard-ის გლობალურ ბრენდს 15 ქვეყანაში უხელმძღვანელებს და პასუხისმგებელი იქნება ისეთ მიმართულებებზე, როგორებიცაა სტრატეგია, შემოსავლები, ბიზნეს ოპერაციები, ფიზიკური ღონისძიებები, საერთაშორისო ლიცენზირება და ბრენდ პარტნიორობები. ის ასევე უხელმძღვანელებს როგორც ბიზნეს, ისე სარედაქციო გუნდებს – Billboard-ის მთავარი რედაქტორი ჰანა კარპი ამიერიდან პირდაპირ ვანთან იქნება ანგარიშვალდებული. მისი დაწინაურება იმ მნიშვნელოვანი წვლილის შედეგია, რაც ვანს Billboard-ის პრეზიდენტის თანამდებობაზე 2022 წლიდან მიუძღვის. მათ შორის არის პლატფორმის ორნიშნა პროცენტული ზრდა, მოგების მკვეთრი გაუმჯობესება, Billboard-ის გლობალური გაფართოება და გაძლიერება. ვანის საქმიანობას უკავშირდება Billboard-ის ციფრული ტრანსფორმაცია და ისეთი ინოვაციური ღონისძიებების განვითარება, როგორებიცაა: Latin Music Week, Billboard Latin Music Awards, THE STAGE SXSW-ზე, Billboard Music Awards და Billboard Women in Music.
ვანის უშუალო მმართველი Penske Media Corporation-ის თავმჯდომარე და აღმასრულებელი დირექტორი ჯეი პენსკი იქნება.
„მაიკი უნიკალური ლიდერია – ძლიერი პარტნიორი თავისი ხედვით,”– განაცხადა პენსკიმ. „Billboard-ის მიმართ მისი თავდადება და ბრენდის მომავლის მკაფიო ხედვა მას ყოველთვის გამოარჩევდა სხვებისგან. მაიკმა შექმნა ურთიერთთანამშრომლობის ისეთი გარემო, რომელიც ემსახურება ძლიერი გლობალური ბიზნესის აშენებას. შთამბეჭდავი იყო Billboard-ის მნიშვნელოვანი ზრდა ბოლო რამდენიმე წლის განმავლობაში და მოუთმენლად ველოდები, ვიხილო, როგორ განაგრძობს ბრენდი განვითარებას მაიკის ხელმძღვანელობით.”
„ჩემთვის უდიდესი პატივია Billboard-ის და ჩვენი გუნდის ხელმძღვანელობა,” – აღნიშნა ვანმა. “ჩვენ ერთად ჩამოვაყალიბეთ სრულყოფილებისაკენ სწრაფვის კულტურა. ის, რაც ბოლო წლებში შევქმენით, მართლაც გამორჩეულია – განსაკუთრებით ისეთ მედია გარემოში, სადაც ხშირია კონსოლიდაცია. მე განსაკუთრებით ვამაყობ, რომ მომეცა შესაძლებლობა, გავაგრძელო [Billboard-ის] მემკვიდრეობა და განვსაზღვრო შემდეგი 125 წლის ფორმირება – არტისტებისა და მენეჯერების მიღწევების გამოკვეთით ჩვენი ჩარტების, კონტენტის, გლობალური IP გაფართოების და ცოცხალი ღონისძიებების განვითარების კვალდაკვალ. ეს არის ის, რითაც ვამყარებთ Billboard-ის, როგორც მუსიკალური ბიზნესისა და კულტურის უპირობო ავტორიტეტის პოზიციებს.”
მაიკ ვანი მსოფლიო დონის მენეჯერია, რომელსაც აქვს მედიის, გასართობი ინდუსტრიისა და ბიზნეს ტრანსფორმაციის მრავალწლიანი გამოცდილება. ბოლო 7 წლის განმავლობაში ის Billboard-ში სხვადასხვა ხელმძღვანელ პოზიციაზე მუშაობდა. ცნობილია თავისი პროგრესული ხედვითა და დიდი ინტერესით კულტურისა და კომერციის გადაკვეთასთან მიმართებაში. ეს უნიკალურ პოზიციაში აყენებს მას, რომ უხელმძღვანელოს Billboard-ის გაფართოების შემდეგ ეტაპს. Billboard-ში საქმიანობის გარდა, ვანს 25 წელზე მეტი გამოცდილება აქვს მარკეტინგისა და მონეტიზაციის სფეროში, მათ შორის Pandora-ს, Electronic Arts-ის და Complex-ის წამყვან პოზიციებზე.
Billboard-ის შესახებ:
Billboard მუსიკალურ სამყაროში წარმატების ყველაზე მაღალ საზომად მიიჩნევა. თავისი საკულტო ჩარტებით, უახლესი ამბებით, ინდუსტრიული ლიდერის სტატუსით, მრავალი პლატფორმის საშუალებით ამბის თხრობითა და მსოფლიო დონის ღონისძიებებით. 1894 წლიდან მოყოლებული, მსოფლიოს მრავალ ქვეყანაში მუსიკის ლიდერები და გულშემატკივრები Billboard-ს აღიქვამენ, როგორც ყველაზე სანდო წყაროს. ბრენდის პრესტიჟული ღონისძიება – Billboard Music Awards – ერთადერთი პრემიაა, რომელიც მუსიკოსების წარმატებებს სწორედ Billboard-ის ჩარტებზე დაფუძნებული უშუალო მონაცემების მიხედვით აფასებს და არა გაუმჭვირვალე კომიტეტების ან უცნობი ამომრჩევლების გადაწყვეტილებებით. ეს სქემა მაქსიმალურად განსაზღვრავს გულშემატკივრების ჩართულობას დაჯილდოების ყოველწლიურ ცერემონიაზე. Billboard-ის სხვა პრემიუმ პროექტები მოიცავს Power 100-ს, Women in Music-ს, Latin Music Week-ს და Billboard Live-ს, რომლებიც მთელი მსოფლიოს მასშტაბით გავლენიან არტისტებსა და ინდუსტრიის ლიდერებს გულშემატკივრებთან აკავშირებენ.
