Maroon 5-ის და BLACKPINK-ის წევრის, LISA-ს ახალი კოლაბორაცია ოფიციალურად დაანონსდა.
25 აპრილს Maroon 5-მა სოციალურ მედიაში დაადასტურა, რომ ისინი LISA-სთან ერთად ახალ სიმღერაზე, Priceless-ზე მუშაობენ.
მიუხედავად იმისა, რომ სიმღერის გამოსვლის ზუსტი თარიღი ჯერ კიდევ უცნობია, გულშემატკივრებს მისი წინასწარ შენახვა Spotify-სა და Apple Music-ზე შეუძლიათ.
Maroon 5-მა ინსტაგრამზე გამოაქვეყნა ვიდეო, სადაც ადამ ლევინი და LISA ფოტოსესიის დროს პოზირებენ, პოსტის აღწერაში კი წერია: “PRICELESS FT. LISA @lalalalisa_m PRE-SAVE NOW.”
პირად ინსტაგრამზე ადამ ლევინმაც გამოაქვეყნა შავ-თეთრი ფოტოები, რომლებიც სავარაუდოდ, Priceless-ის მუსიკალურ ვიდეოკლიპზე მუშაობის დროს გადაიღეს.
Priceless-ის ოფიციალურად დაანონსებამდე Maroon 5-მა ინსტაგრამზე ფოტო გამოაქვეყნა, სადაც ადამ ლევინი და უცნობი ქალი გვერდიგვერდ დგანან, მოგვიანებით კი გაირკვა რომ ეს ქალი LISA გახლდათ. პარალელურად BLACKPINK-ის წევრმაც გააზიარა ინსტაგრამ სთორი, სადაც ჩანდა, რომ მუსიკალური კლიპის გადაღებებში იღებდა მონაწილეობას. ამ პოსტებმა კი გულშემატკივრების ვარაუდი მათ კოლაბორაციაზე კიდევ უფრო გაამყარა.
Priceless-ის გამოსვლის შესახებ ინფორმაცია ოფიციალურად მას შემდეგ დადასტურდა, რაც რამდენიმე კვირის წინ, შაბათის ღამის შოუში ადამ ლევინმა ამ ზაფხულს Maroon 5-ის ალბომის გამოსვლა დააანონსა. მაშინ დეტალები არ გამჟღავნებულა, თუმცა ბენდის ფრონტმენმა თვის ბოლოს ახალი სინგლის გამოსვლაზეც მიანიშნა.
ამავდროულად, LISA სადებიუტო სოლო ალბომის Alter Ego-ს წარმატების ზენიტშია, სადაც იგი Rosalía-სთან, Megan Thee Stallion-თან, Doja Cat-თან, RAYE-სთან და სხვა ვარსკვლავებთან ერთად თანამშრომლობს. ალბომმა Coachella-ზე არტისტის წარმატებულ გამოსვლებში მნიშვნელოვანი როლი ითამაშა, Billboard 200-ის ტოპ ათეულში კი მე-7 ადგილზე მოხვდა.
